Goa Fishing Ban: गोव्यात एक जूनपासून दोन महिने मासेमारीला बंदी; सरकारची घोषणा

पणजी: गोव्यात वार्षिक मासेमारी बंदी सरकारच्या वतीने जाहीर करण्यात आली आहे. येत्या ०१ जूनपासून ३१ जुलैपर्यंत ही बंदी राहणार आहे. मान्सूनचे सुरवातीचे दोन महिने राज्यात दरवर्षी ही बंदी घातली जाते.

०१ जूनपासून ३१ जुलै या ६१ दिवसांच्या बंदी कालावधीत यांत्रिक साधने बसवलेल्या जहाजांद्वारे मासेमारी , ट्रॉल-नेट आणि पर्स-सीन नेटद्वारे मासेमारी करण्यास मनाई असणार आहे. गोवा सागरी मासेमारी नियमन अधिनियम, 1980 (1981 चा कायदा क्रमांक 3) च्या कलम 4 च्या उपकलम (1) आणि (2) अंतर्गत हा निर्णय घेण्यात आला आहे.

राज्यात मासेमारीला बंदी असलेल्या काळात होड्यांवर काम करणारे परराज्यातील कर्मचारी आपापल्या घरी परतात. ३१ मेनंतर ट्रॉलर्समालकांना मच्छीमारी जेटीचा वापर व्यवसायासाठी करता येत नाही. ३१ मे पर्यंत मच्छीमार होड्यासह विविध साहित्यांची आवराआवर सुरू करतात.