Goa Crime: आईस्क्रीम फ्रँचायझी देतो, असे सांगून घातला 4 लाखांना गंडा; बिहारमधून तरुणाला अटक

म्हापसा: आईस्क्रीम फ्रँचायझी देतो, असे सांगून थिवीमधील फिर्यादीला तब्बल ४ लाख रुपयांचा गंडा घातल्याप्रकरणी कोलवाळ पोलिसांनी संशयिताला पटना, बिहारमधून ताब्यात घेत अटक केली. या संशयिताला पोलिसांनी ट्रान्झिट रिमांडवर गुरुवारी गोव्यात आणले असता, त्याला डिचोली कोर्टात उभे केले असता, या न्यायालयाने संशयिताला पाच दिवसांची पोलिस कोठडी सुनावली.

हा सायबर फसवणुकीचा प्रकार मे ते ९ जून २०२५ दरम्यान घडला होता. याप्रकरणी कोलवाळ पोलिसांनी थिवीमधील फिर्यादीच्या तक्रारीनुसार, संशयित अलोक कुमार (१९) याला अटक केली. संशयिताने फिर्यादीला नॅचरल या आईस्क्रीमची फ्रँचायझी मिळवून देतो, असे सांगितले.

त्यानुसार, फिर्यादीस ४ लाख २४ हजार ९०० रुपये नोंदणी, सुरक्षा व सॉफ्टवेअर शुल्क स्वरुपात पैसे दोन बँक खात्यात जमा करण्यास सांगितले. त्यानुसार, फिर्यादीने पैसे ऑनलाईन पद्धतीने बँक खात्यात जमा केले. यावर संशयिताने फिर्यादीस संबंधित फ्राँचायझीची खोटी नोंदणी प्रमाणपत्र दिले.

कालांतराने, संशयिताने फिर्यादीकडून आणखी पैशांची मागणी केली, तसेच त्याने फिर्यादीस फ्रॅंचायझीही दिली नाही. याप्रकरणी फिर्यादीने कोलवाळ पोलिसांत तक्रार दिली असता, पोलिसांनी संशयिताविरुद्ध गुन्हा नोंद केला.

त्यानुसार, कोलवाळ पोलिसांनी शिताफिने व तांत्रिक देखरेखीच्या आधारे, अलोक कुमार (१९) याला पटना, बिहारमधून ताब्यात घेत अटक केली. दरम्यान, या संशयिताने देशातील इतर पाच ठिकाणी अशाच पद्धतीने इतरांची तब्बल २२.२ लाख रुपयांची फसवणूक केली आहे.