Human Trafficking in Goa: गोव्यात जगभरातून मानवी तस्करी

Human Trafficking in Goa: भारतातील 25 राज्यांतून मुलींना गोव्यात आणले जाते. यात सर्वाधिक प्रमाण महाराष्ट्र, पश्‍चिम बंगाल तसेच दिल्लीतील मुलींचे आहे. याप्रमाणेच नेपाळ, बांगलादेश, मध्य आशियायी देशांतूनही प्रामुख्याने मानवी तस्करी होते, असे अन्याय रहित जिंदगी (अर्ज)चे संस्थापक अरुण पांडे यांनी सांगितले. ते ‘गोमन्तक टिव्ही’वर संपादक-संचालक राजू नायक यांच्या ‘सडेतोड नायक’ या विशेष कार्यक्रमात बोलत होते.

गोवा हे आंतरराष्ट्रीय पर्यटनस्थळ असल्याने येथे मोठ्या प्रमाणात मानवी तस्करी होते. यासाठी देशभरातील दलाल सक्रिय असून ग्राहकांच्या मागणीनुसार देश-विदेशातील मुली ते येथे पुरवतात, हे अनेकवेळेला पोलिसांच्या छाप्यांतून स्पष्ट झाले आहे. याचा पर्यटनावर विपरित परिणाम होत आहे. यामुळे वेश्‍याव्यवसायाला आळा घालण्यासाठी गांभीर्याने पावले उचलली पाहिजेत, असे पांडे यांनी सांगितले.

दरम्यान, पर्यटनवाढीसाठी आम्ही आपल्या मुली व महिलांना धोक्यात घालून महसूल कमवू नये. याचा विचार पर्यटन धोरणाच्या अनुषंगाने व्हावा. राज्यात लैंगिक तस्करी बंद होण्यासाठी सर्व यंत्रणांनी सक्रियपणे कार्य करणे गरजेचे आहे. जो व्यक्ती आपल्या वासनेसाठी अशाप्रकारे महिलांची मागणी करणे मोठा गुन्हा आहे; परंतु अशा व्यक्तींवर कारवाई होताना दिसत नसल्याची खंत पांडे यांनी व्यक्त केली.

दलालांनाच होतो फायदा

वेश्‍याव्यवसायात कोट्यवधींची उलाढाल होते. परंतु या व्यवसायात ज्या महिला गुंतलेल्या असतात त्या महिलांना याचा कोणताच फायदा होत नाही, उलट त्यांचा वापर करून दलाल मोठे होतात. त्यामुळे दलालांना हा व्यवसाय कायदेशीर झालेला हवा आहे, असे मत पांडे यांनी व्यक्त केले.

मानवी तस्‍करी व वेश्‍याव्यवसाय रोखण्यासाठी...

१ महिलांची मागणी करणाऱ्यांवर कठोर कारवाई व्हावी.

२ महिलांना या व्यवसायात येण्यापासून रोखावे.

३ ज्या या व्यवसायात आहेत त्याचे पुनर्वसन करावे.

४ दलालांवर कठोर कारवाई करावी.