Goa Crime: वास्कोतील मानवी तस्करीप्रकरणी तिसऱ्या संशयिताला अटक; नोकरीचे आमिष देऊन महिलेची केली होती फसवणूक

Vasco Human Trafficking Case

पणजी : वास्कोतील मानवी तस्करीप्रकरणी अक्रम अली शेख या तिसऱ्या संशयिताला चेन्नई विमानतळावर अटक करण्यात आली आहे. पीडितेच्या वतीने अरुणेंद्र पांडे (संस्थापक आणि संचालक, अर्ज) यांनी दिलेल्या लेखी तक्रारीवरून गुन्हा दाखल करण्यात आला आहे.

तस्करीची घटना १९ ते २८ ऑक्टोबर २०२४ दरम्यान घडली होती. या काळात सय्यद अब्दुल्ला शेख आणि मस्तान खान ऊर्फ पठाण यांनी पीडितेला मस्कत येथे घरकामाची नोकरी मिळवून देण्याचे आमिष दाखवले आणि तेथे पोहोचल्यावर वेतन दिले जाईल, असे सांगितले.

परंतु, या दोघांनी फसवणूक करून पीडितेला मस्कत येथे पाठविले व एका फ्लॅटमध्ये अन्य ११ भारतीय महिलांसोबत ठेवले, जिथे योग्य अन्न व निवासाची सुविधा नव्हती.

त्यानंतर इतर आरोपींच्या मदतीने पीडितेला एका शेखच्या घरी कामासाठी पाठविण्यात आले. तिथे तिच्यावर लैंगिक शोषणासाठी दबाव टाकण्यात आला. सध्या दोघे संशयित न्यायालयीन कोठडीत आहेत.