Mahadayi Water Dispute : म्हादईसाठी 20 मे रोजी पणजीत मानवी साखळी; ‘सेव्ह गोवा सेव्ह म्हादई फ्रंट’चा पुढाकार

कर्नाटककडून म्हादईचे पाणी वळविण्याच्या प्रयत्नांविरोधात आता ‘सेव्ह गोवा-सेव्ह म्हादई फ्रंट’च्या आंदोलनाला हेरिटेज ॲक्शन ग्रुपने पाठिंबा दर्शविला असून 20 मे रोजी पणजीत मानवी साखळीचे आयोजन केले आहे.

‘म्हादय आमची माय’ या फेस्टिव्‍हलचा हा भाग असेल, अशी माहिती प्रसिद्ध इतिहासतज्‍ज्ञ हेता पंडित यांनी आज दिली. सध्या हे प्रकरण सर्वोच्च न्यायालयात आहे.

केंद्रीय जलआयोगाने कळसा-भांडुरा प्रकल्पाचे पाणी कर्नाटकात वळविण्यासाठी दिलेल्या डीपीआर मंजुरीनंतर राज्यभर असंतोष कायम आहे. त्यातच कर्नाटकातील निवडणुकीच्या प्रचारादरम्यान भाजप आणि काँग्रेसने हे पाणी वळवण्यासाठी आमचे प्राधान्याचे प्रयत्न असतील असे जाहीर केल्याने या प्रकरणाला वेगळेच वळण लागले आहे.

सात किमी अंतर

‘सेव्ह गोवा-सेव्ह म्हादई फ्रंट’ आणि ‘हेरिटेज ॲक्शन ग्रुप’च्या वतीने 20 मे रोजी मानवी साखळीबरोबर विविध उपक्रम राबवले जातील. ही मानवी साखळी करंजाळे ते सांता मोनिका जेटी या सात किलोमीटर अंतरापर्यंत असेल.

विविध क्षेत्रांतील कलाकार, मच्छीमार, शेतकरी, कार्यकर्ते त्‍यात सहभागी होणार आहेत. कर्नाटकच्या विळख्यातून म्हादईला वाचविण्यासाठी सेव्ह गोवा, सेव्ह म्हादई चळवळीने आता पुढाकार घेतला आहे.