पर्यटकांना गोव्याकडे आकर्षित करण्यासाठी हॉटेल मालकांची सरकार बरोबर चर्चा

मडगाव : गोव्यातील लहान आणि मध्यम हॉटेल्सच्या मालकांनी शुक्रवारी सरकारला त्यांना मदत करण्याचे आवाहन केले. सरकारी अधिकारी आणि हॉटेल मालकांमध्ये झालेल्या बैठकीत हॉटेल व्यवसायासंबंधित अनेक मुद्द्यांवर चर्चा करण्यात आली. (hotel owners in goa meets government officials)

"मीटिंगमध्ये आम्ही आमच्या व्यवसायाशी संबंधित विविध मुद्द्यांवर चर्चा केली. कोरोनामुळे झालेले नुकसान, कोविड महामारीपासून गोव्यातील चार्टर फ्लाइट्सची कमी झालेली संख्या अशा मुद्यांवर सरकारशी चर्चा झाली," असे हॉटेल मालक म्हणाले.

अनेक गेस्ट हाऊस गेल्या दोन वर्षांपासून बंद आहेत. सरकारने ते सुरू करण्यास आर्थिक मदत करावी, अशी देखील मागणी करण्यात आली. याचबरोबर पर्यटनाशी संबंधित इतर अनेक मुद्द्यांवरही बैठकीत चर्चा झाली, अशी माहिती समोर येत आहे.

आगामी पर्यटन हंगामात पर्यटकांना गोव्याकडे आकर्षित करण्यासाठी सरकारने पावले उचलावीत, अशी मागणी देखील यावेळेस करण्यात आली.