वास्कोत गुलालोत्सवाची धूम, शहरात भव्य मिरवणूक

वास्को: मुरगाव शिमगोत्सव समितीतर्फे गुलालोत्सव उत्साहात साजरा करण्यात आला. वास्कोत श्री दामोदर चरणी गुलाल वाहील्यानंतर गुलालोत्सव म्यूझीक, बँडबाजा, ऑर्केष्ट्राने वास्को शहरात मिरवणूक काढून साजरा करण्यात आला. नागरीकांनी गाण्यांच्या हिंदोळ्यावर नाच गाण्यात सहभाग दर्शविला. यात शेकडो नागरिक सहभागी झाले होते. तसेच प्रत्येक वाड्यावर लहान मुलांबरोबर महीलांमध्येही उत्साह दिसून आला.

वर्ष पद्धती प्रमाणे वास्को (Vasco) शहरात मुरगाव शिगमोत्सव समितीर्फे गुलालोत्सव साजरा केला. कोरोना महामारीमुळे दोन वर्षे कार्यक्रमात खंड पडला होता. यंदा कोरोनाचे (Coronavirus) संकट दूर होऊन उसंत मिळाल्याने मुरगाव तालुक्याबरोबर वास्को शहरात धुलीवंदन पाहण्यास मिळाले. यात लहान मुलांपासून अबाल वृध्दांपर्यत नागरीकांनी आपला सहभाग दर्शवून धुवंदनाच्या कार्यक्रमात मौजमजा केली.

सकाळी येथील ग्रामदैवत श्री दामोदर चरणी गुलाल वाहील्यानंतर मुरगाव शिमगोत्सव समितीतर्फे धुळीवंदनाला सुरुवात केली. वास्कोचे नवनिर्वाचीत आमदार दाजी साळकर तसेच मूरगावचे आमदार संकल्प आमोणकर यांनीही धुलीवंदनात आपला सहभाग दर्शवीला. यावेळेस नागरिक मोठ्या संख्येने उपस्थित होते. पुरोहीतामार्फत श्रीचरणी गान्हाणे घातल्यानंतर धुलीवंदनाच्या कार्यक्रमाला सुरुवात झाली. नंतर ट्रकावर ऑर्केष्ट्राच्या नाच गाण्यावर वाजत गाजत मिरवणूकीला सुरुवात झाली. मिरवणूक श्री दामोदर मंदिराकडून सेंट अ‍ॅण्ड्रयू चर्च, एफ एल गोम्स मार्गावरून पालिकेसमोर, नंतर रेल्वे स्थानकाकडे मिरवणूकीची सांगता झाली. यात शेकडो नागरीकांनी भाग घेऊन यंदाची होळी (Holi) धुलीवंदन उत्साहात साजरी केली.