...म्हणून गोव्यात सत्ता स्थापनेला विलंब; तानावडेंनी दिले स्पष्टीकरण

पणजी: सरकार स्थापनेला होत असलेल्या विलंबाच्या पार्श्वभूमीवर गोवा भाजपचे प्रदेशाध्यक्ष सदानंद शेट तानावडे यांनी गुरुवारी गोव्याचे राज्यपाल पी. एस. श्रीधरन पिल्लई यांची राजभवनात भेट घेतली.

भाजपचे संघटन सचिव सतीश धोंड यांच्यासमवेत तानावडे यांनी राज्यपालांशी झालेल्या चर्चेबाबत मौन बाळगले. पत्रकारांनी वारंवार विचारणा केल्यावर तानावडे म्हणाले की, ही एक औपचारिक भेट होती.

मुख्यमंत्री डॉ. प्रमोद सावंत (Pramod Sawant), तानावडे आणि धोंड यांनी बुधवारी दिल्लीत पंतप्रधान नरेंद्र मोदी (Narendra Modi) आणि इतर केंद्रीय मंत्र्यांची भेट घेतल्याच्या पुढील दिवशी तानावडे राज्यपाल पी. एस. श्रीधरन पिल्लई यांना भेटले. परिणामी या बैठकीला महत्त्व प्राप्त झाले. सावंत परत एकदा सरकारचे नेतृत्व करणार असे स्पष्ट असले, तरीही अधिकृत घोषणा अद्याप झालेली नाही. “हे 2-3 दिवस होळीत जातील. भाजप (BJP) एकत्रितपणे जिंकलेल्या चारही राज्यांमध्ये सरकार स्थापन करणार असल्याने गोव्यात सरकार स्थापनेला उशीर होत आहे,” तानावडे म्हणाले.