'सनबर्न'च्या विरोधात आता हिंदू जनजागृती समितीची उडी, मुख्यमंत्र्यांना भेटून महोत्सव हद्दपार करण्याची मागणी

पर्वरी: ‘सनबर्न’च्या आयोजकांनी सरकारची अनुमती न घेताच यंदा दक्षिण गोव्यात ‘सनबर्न २०२४’चे आयोजन करणार असल्याचे घोषित केले आहे. तिकीट विक्रीलाही प्रारंभ केला आहे.

युवा पिढीला अंमली पदार्थांच्या आहारी नेणारे आणि व्यसनाधीन बनवणार्‍या ‘ईडीएम्’ आणि ‘सनबर्न’सारख्या महोत्सवांना केवळ दक्षिण गोव्यात नव्हे, तर संपूर्ण गोव्यात कुठेही अनुमती देऊ नये, अशी मागणी हिंदू जनजागृती समितीने मुख्यमंत्री डॉ. प्रमोद सावंत यांची भेट घेऊन त्यांच्याकडे एका निवेदनाद्वारे केली आहे.

या वेळी हिंदू जनजागृती समितीच्या शिष्टमंडळामध्ये ‘भारत माता की जय’ संघटनेचे रामदास सावईवेरेकर, हिंदू जनजागृती समितीचे युवराज गावकर आणि सनातन संस्थेच्या शुभा सावंत यांचा समावेश होता.

‘सनबर्न गोव्यात चालू झाला तेव्हापासूनच हिंदू जनजागृती समिती त्याच्या आयोजनाला विरोध करत आहे. गेल्या वर्षी उत्तर गोव्यातील पर्यावरण प्रेमी आणि संस्कृती प्रेमी लोकांनी या महोत्सवाला विरोध दर्शवला होता आणि त्यावेळी सनबर्नचे मालक सिंग यांनी आपला शेवटचा महोत्सव असेल असे घोषित केले होते.

तरी यावर्षी सनबर्न दक्षिण गोव्यात आयोजित करणार असे सांगून तिकीट विक्री चालू केली आहे आणि गोमंतकियांना फसवले असेही समितीने म्हटले आहे.

मोठ्या आवाजातील इलेक्ट्रॉनिक डान्स म्युझिक गोव्यात समुद्रकिनार्‍यावरील अनेक पब आणि रेस्टॉरंट क्लब यामध्ये चालू असते यालाही स्थानिकांचा विरोध असतो. यामुळे परिसरातील नागरिकांना ध्वनीप्रदूषणाचा त्रास होतो. उच्च न्यायालयाने याची दखल घेतली आहे. या कार्यक्रमावरही सरकारने बंदी घालायला हवी, अशी मागणी समितीने केली आहे.