Sopo Tax: महानगरपालिका बैठकीत सोपो करावरून जोरदार गदारोळ

Sopo Tax: विना पावती सोपो कर संकलन करण्याचा मुद्दा अपेक्षेनुसार महापालिका बैठकीत गाजला. नगरसेवक उदय मडकईकर आणि सुरेंद्र फुर्तादो यांनी सोपो कराच्या पावत्याच सभागृहात दाखविल्या. प्रत्येक पावतीमागील सहा रुपये कोणाच्या खिशात जातात? असा सवाल करीत पंधरा वर्षांच्या घोटाळ्यात कोणत्याही चौकशीला आम्ही तयार असल्याचे दोघांनीही आश्‍वासन दिले.

पे-पार्किंग कंत्राटदारास मुदतवाढ देण्याचा प्रस्ताव आपण मांडलाच नाही, तरी आपले नाव नोटमध्ये का घातले? या विषयावरून मडकईकर यांनी आयुक्तांवर हल्लाबोल करीत कारवाई करण्याचा इशारा दिला.

महानगरपालिकेच्या सभागृहात झालेल्या बैठकीत सुरुवातीलाच फुर्तादो यांनी स्वीकृत नगरसेवक किशोर शास्त्री यांचा निवडून आलेल्या नगरसेवकांच्या प्रभागात वाढलेल्या हस्तक्षेपावर आक्षेप नोंदविला.

त्याशिवाय मार्केटमध्ये प्रभुदेवा याला ३००० चौ. मी.जागा कोणाच्या मंजुरीने दिली? असा सवाल केला. फुर्तादो यांचे विषय संपताच मडकईकर यांनी या बैठकीवर आक्षेप नोंदविला. महानगरपालिकेची बैठक किती महिन्यांनी घेतली जावी, असा सवाल त्यांनी आयुक्तांना केला. त्याशिवाय मार्केट परिसरात विना पावती सोपो कर संकलन करण्याचा जो प्रकार घडला आहे, त्याविषयी माहिती सादर केली.

रोजंदारीवर असलेले कर्मचारी आपणास उलट उत्तर देत असल्याचेही त्यांनी निदर्शनास आणून दिले. याप्रकरणी मार्केट समिती अध्यक्ष बेंटो लॉरेन व मडकईकर, फुर्तादो यांच्यात शाब्दिक चकमक उडाली.

मुख्य सचिवांकडे करणार तक्रार

शहरात पे-पार्किंगचे कंत्राट घेतलेल्या जुवारकर असोसिएट कंपनीला दिलेल्या मुदतवाढीचा प्रस्ताव आपण मांडला नसतानाही, त्यात आपले नाव कसे आले? असा सवाल मडकईकर यांनी आयुक्तांना केला. यावेळी मडकईकरांचा राग अनावर झाल्याचे दिसून आले. त्याशिवाय याबाबत आपण मुख्य सचिवांकडे तक्रार करणार असल्याचेही त्यांनी सांगितले. त्याचवेळी फुर्तादो यांनी आयुक्तांनी ते पत्र मागे घ्यावे, असा सल्लाही दिला.