Panaji Traffic Jam: पणजी, पर्वरी, रायबंदर, दिवजा सर्कल येथे प्रचंड वाहतूक कोंडी

Panaji Traffic Jam: राज्य सरकारने अटल सेतूच्या सर्व लेने सर्व प्रकारच्या वाहतुकीसाठी अचानक बंद करण्याचा निर्णय घेतल्याने मंगळवारी वाहतूक कोंडीचा सामना करावा लागला होता. बुधवारी सकाळीही त्याचीच पुनरावृत्ती झाली.

बुधवारी, 5 मार्च रोजी सकाळी पणजीतील दिवजा सर्कल, रायबंदर रोड, पर्वरी रस्त्यावर दोन्ही बाजूंनी वाहनांच्या लांबच लांब रांगा लागल्या होत्या.

सर्व ठिकाणी वाहनांच्या रांगा लागल्या असून वाहतूक संथ गतीने पुढे सरकत होती. या वाहतूक कोंडीचा फटका नागरीकांसह चाकरमान्यांना बसला. या काळात सर्व कार्यालये सुरू होत असतानाच्या काळातच वाहतूक कोंडीमुळे अनेकांना कार्यालयात पोहचायला उशीर झाला.

दरम्यान, मंगळवारी देखील वाहतूक कोंडी झाली होती. डांबरीकरणाचे काम पूर्ण होईपर्यंत पूल बंद असल्याने चालक, प्रवाशांना कोंडीचा त्रास सहन करावा लागणार आहे. अटल सेतू हा पुढील काही दिवस बंद असल्याने लोकांनी नेहमीच्या वेळेपेक्षा अगोदर घरातून बाहेर पडावे, असे आवाहन प्रशासनाने केले होते.

प्रत्येक जंक्शनच्या ठिकाणी वाहतूक पोलिसांनी एखादे वाहन नादुरुस्त होऊन बंद पडल्यास ते बाजूला करण्यासाठी क्रेन तयार ठेवली आहे. काही ठिकाणी डांबरीकरणाचे काम संथगतीने सुरू आहे.