गंगाराम आवणे
अडीच वर्षांचा असताना बालकलाकार म्हणून मी चित्रपटसृष्टीत पदार्पण केले. परंतु आता ‘हनुमान’ चित्रपटामुळे मला देशभर ओळख मिळाली. त्यामुळे पुढील वाटचालीची जबाबदारी वाढली आहे. कलाकार म्हणून अभिनयातून प्रेक्षकांचे मनोरंजन करण्याला प्राधान्य देतो. सिनेरसिकांचे प्रेम हाच माझ्यासाठी पुरस्कार आहे, असे प्रसिद्ध तामीळ चित्रपट अभिनेता तेजा सज्जा याने सांगितले.
दक्षिणेतील सुपरस्टार चिरंजीवी यांनी मला बालकलाकार म्हणून ‘चुडालानी वुंदी’ या चित्रपटात पहिल्यांदा काम करण्याची संधी दिली. त्यांच्यामुळेच मी आज चित्रपटसृष्टीत कार्यरत आहे. ते नसते तर मी घडलोच नसतो. त्यामुळे चिरंजीवी माझ्यासाठी पितृतुल्य आहेत, असे तेजा म्‍हणाला.
तेलगू चित्रपटसृष्टीत मागील तीस-चाळीस वर्षांपासून अतिशय उत्तम चित्रपट प्रदर्शित होत आहेत. उत्तम अभिनय, पटकथा, संगीत याचा समृद्ध वारसा लाभला आहे. मागील काही वर्षांत तेलगू चित्रपटांकडे साऱ्या जगाचे लक्ष गेले. परंतु हे केवळ तेलगू चित्रपट चाहत्यांमुळे शक्य झाले.
या सिनेरसिकांनी दिलेल्या प्रेमापोटीच तेलगू चित्रपटसृष्टी समृद्ध झाली आणि आज तिला जागतिक पटलावर मानाचे स्थान प्राप्त होत आहे, असेही तेजा याने अभिमानाने सांगितले.
जर आपल्याला गुणवत्तापूर्ण चित्रपट द्यायचे असतील तर चित्रपटांसाठी अधिक कालावधी द्यावा लागतो. ‘पुष्पा’, ‘आरआरआर’, ‘बाहुबली’ यासारखे चित्रपट बनविण्यासाठी अनेक वर्षे लागली. ‘हनुमान’ या चित्रपटासाठी मी मागील तीन वर्षे काम करत आहे. भारतीय चित्रपटांमध्ये आंतरराष्ट्रीय स्तरावर चमकण्‍याची क्षमता आहे. येणाऱ्या काळात भारत हा आंतरराष्ट्रीय स्तरावर चित्रपटसृष्टीचा केंद्रबिंदू बनेल, असे तेजा सज्जा म्‍हणाला.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.