चिंबल जंक्शन येथील उड्डाणपुलाचे काम सुरू असून सुमारे 60 टक्के काम पूर्ण झाले आहे. रायबंदर रस्ता बंद झाल्यामुळे या जंक्शनच्या ठिकाणी नेहमी वाहतुकीची कोंडी होत असल्याने हे काम बंद करण्याची मागणी काहींनी केली असली तरी ती मान्य केली जाणार नाही.
या जंक्शनवर अनेक अपघात होऊन स्थानिकांना जीव गमवावा लागला आहे. त्यामुळे हा उड्डाणपूल लवकरात लवकर पूर्ण व्हावा यासाठी आपण प्रयत्न करत असल्याची माहिती सांताक्रुझचे आमदार रुडॉल्फ फर्नांडिस यांनी दिली.
रायबंदर येथील रस्त्याचे काम हे दहा वर्षांपूर्वीचे आहे. ते गेली अनेक वर्षे रखडले होते. सांताक्रुझ मतदारसंघातील कामे व्हावीत यासाठी सत्ताधारी भाजपात आलो, तेव्हापासून अनेक कामांना चालना मिळाली, असे रुडॉल्फ म्हणाले.
बोंडवेल तलाव पाणथळ भाग!
रुडॉल्फ फर्नांडिस यांनी सांगितले की, सांताक्रुझ येथील बोंडवेल तलावातील पाणी काही अज्ञातांनी सोडून ते आटविले होते. याविरोधात स्थानिकांनी तक्रारी केल्यानंतर तेथे असलेल्या व्हॉल्वच्या सुरक्षिततेसाठी आवश्‍यक ती सुरक्षा उभारण्यात आली आहे.
केंद्र सरकारने बोंडवेल तलावाला पाणथळ (ओलसर जमीन) म्हणून घोषित केले असल्याने तेथे कोणालाही हस्तक्षेप करता येणार नाही. यासंदर्भात जुने गोवे पोलिसांत अज्ञाताविरुद्ध गुन्हा दाखल केलेला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
