Mahadayi Water Dispute: ‘म्हादई जागोर’सह ‘हात से हात जोडो’ अभियान

Mahadayi Water Dispute: प्रदेश काँग्रेसतर्फे ‘म्हादई जागोर'' ही मोहीम सुरूच आहे. त्याच्या जोडीला आता ‘हात से हात जोडो’ या अभियानाची सुरुवात प्रजासत्ताक दिनाचे औचित्य साधून पणजीतील आझाद मैदानावरून झाली. याप्रसंगी अखिल भारतीय काँग्रेस समितीचे निरीक्षक डॉ. एस. सैलजनाथ, प्रदेशाध्यक्ष अमित पाटकर, खासदार फ्रान्सिस्को सार्दिन व इतर मान्यवरांची उपस्थिती होती.

"हात से हाथ जोडो" आणि "म्हादई जागोर" मोहिमेची सुरुवात पणजी येथील ऐतिहासिक आझाद मैदानावर करण्यात आली. 100 दिवस चालणारी ही मोहीम गोव्यातील प्रत्येक मतदारसंघातील कॉंग्रेस गट राबविणार आहेत.

त्यानिमित्त म्हादईचे जल कलशाद्वारे गोवाभर फिरवण्यात येणार आहे. त्याबाबत प्रत्येक गटामध्ये हे अभियान चालविले जाणार असल्याची माहिती याप्रसंगी देण्यात आली. 30 जानेवारीला राष्ट्रपिता महात्मा गांधी यांना अभिवादन करण्यासाठी प्रत्येक कार्यकर्त्याने हातात तिरंगा घेऊन अभियानात सहभागी व्हायचे आहे.

पक्षाचे नेते राहुल गांधी यांनी कन्याकुमारी ते काश्‍मीर अशी भारत जोडो यात्रा काढलेली आहे. या यात्रेच्या माध्यमातून सर्वांना सामावून घेण्याचा प्रयत्न केला गेला आहे. कोणतीही निवडणूक डोळ्यासमोर ठेवून काढलेली ही यात्रा नाही.

परंतु देशातील जनतेच्या व कार्यकर्त्यांच्या मनात असलेली निराशा दूर करण्याचा प्रयत्न या यात्रेच्या माध्यमातून झाली आहे.

राहुल गांधी यांच्या भारत जोडो यात्रेच्या पार्श्वभूमीवर राज्यातील कार्यकर्त्यांना ऊर्जा देण्यासाठी हात से हात जोडो हे अभियान राबविले जात आहे. त्याचा प्रारंभ 26 तारखेपासून करण्यात आला असल्याचे पाटकर यांनी सांगितले.

ज्येष्ठ उपाध्यक्ष एम. के. शेख, वाळपई काँग्रेस नेत्या मनीषा उजगावकर, दक्षिण गोवा संयोजक सुभाष फळदेसाई, उत्तर गोवा संयोजक विजय भिके यांनीही या सभेला मार्गदर्शन केले.