मडगाव: गुळे - काणकोण येथे आपल्या पत्नीचा दुपट्टयाने गळा आवळून खून केल्याप्रकरणी संशयित अजय ऊर्फ गुलझारीया याला न्यायालयाने निर्दोष ठरविले. दक्षिण गोवा सत्र न्यायालयाचे न्यायाधीश राम प्रभुदेसाई यांनी हा निवाडा दिला.
२०२२ साली खुनाची वरील घटना घडली होती. न्यायालयात पोलिसांनी दाखल केलेल्या आरोपपत्रानुसार अजयने आपली पत्नी सविता देवी (४२) हिला बाजारहाट करण्याचे निमित्त करून मडगावहून कदंब बसमधून काणकोण येथे नेले होते. गुळे येथे दोघेही उतरले. नंतर संशयित तिला घेऊन सरकारी प्राथमिक शाळेजवळ गेला व दुपट्ट्याने तिचा गळा आवळून खून केला. मागाहून त्याने घटनास्थळावरून पळ काढला होता.
महिलेचा मृतदेह सापडल्यानंतर व वैद्यकीय तपासणी अहवालात गळा आवळ्याचे स्पष्ट झाल्यानंतर काणकोण पोलिसांनी खुनाचे प्रकरण प्रकरण नोंदवून घेतले होते. कुणी महिला बेपत्ता आहे का याचा तपास पोलिसांनी सुरू केला असता, मडगाव पोलिस ठाण्यात एक महिला बेपत्ता असल्याची तक्रार नोंद असल्याचे पोलिसांना आढळून आले.
मयताच्या मुलीने आपली आई बेपत्ता असल्याची तक्रार नोंदवली होती. तपासात अजय हाही गायब असल्याचे आढळून आले. त्यामुळे पोलिसांचा त्याच्यावरील संशय बळावला. पोलिस चौकशीत तो आपल्या मूळ गावी बिहार येथे पळून गेल्याची माहिती मिळाल्यानंतर काणकोण पोलिसांनी आपले एक पथक बिहार येथे पाठवून अजयला पकडले होते.
काणकोण पोलिस ठाण्याचे तत्कालीन पोलिस निरीक्षक प्रवीण गावस यांनी या प्रकरणाचा तपास केला होता. न्यायालयात सरकार पक्ष संशयितावरील आरोप सिद्ध करू शकले नाही. त्यामुळे त्याला निर्दोष ठरविण्यात येत असल्याचा निकाल न्यायालयाने दिला.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.