Gudi Padwa 2024 : नववर्ष स्वागतानिमित्त पर्वरीत दिंडी मिरवणूक

Gudi Padwa 2024 :

पर्वरी, नववर्ष स्वागत सोहळा मोठ्या उत्साहात साजरा करण्यात आला. यावेळी नववर्ष स्वागत समितीतर्फे सकाळी रामवडेश्‍वर मंदिराकडून दिंडी मिरवणूक काढण्यात आली.

या मिरवणुकीत आबालवृद्ध मोठ्या संख्येने सहभागी झाले होते. नंतर गृहनिर्माण सोसायटीजवळील हनुमान मंदिराच्या प्रांगणात गुढी उभारण्यात आली.

यावेळी व्यासपीठावर नववर्ष स्वागत समितीचे अध्यक्ष अशोक गदग, जनहित मंडळाचे दिनेश एकावडे, भारत विकास परिषदेचे अध्यक्ष डॉ. पद्मनाभ राताबोली, संयोजक माधव केळकर आणि वक्ते प्रा. डॉ. अरुण र. मराठे उपस्थित होते.

प्रा. डॉ. अरुण मराठे यांनी भारतीय तत्त्वज्ञानातील कर्मफल सिद्धांत मांडला. तसेच रामायण-महाभारतातील संदर्भ घेऊन मार्गदर्शन केले. सूत्रसंचालन सुनीता फडणवीस, प्रस्तावना अशोक गदग तर आभार प्रदर्शन माधव केळकर यांनी केले. उर्विजा नागवेकर हिने पसायदान सादर केले.