GTDCची मोन्सून ट्रेकिंग ऑफर! तांबडी सुर्ला धबधब्यासोबत निसर्गाची अनोखी सफर; अधिक माहितीसाठी वाचा

तांबडी सुर्ला: पावसाळ्यात गोव्याच्या निसर्गाचा अनुभव घेण्यासाठी गोवा पर्यटन विकास महामंडळ सज्ज झाले आहे. येत्या रविवार म्हणजेच २९ जून रोजी तांबडी सुर्ला धबधब्यावर एका विशेष मोन्सून ट्रेकिंग मोहिमेचे आयोजन केले असल्याची घोषणा GTDC ने केली आहे.

पावसाळ्यातील नयनरम्य ठिकाण तांबडी सुर्ला

भगवन महावीर वन्यजीव अभयारण्यातील हिरवीगार वनराई आणि नयनरम्य तांबडी सुर्ला धबधबा हे गोव्यातील पावसाळ्यातील सर्वात आकर्षक ठिकाणांपैकी एक आहे. या मोहिमेअंतर्गत, सहभागींना १२ व्या शतकातील प्राचीन तांबडी सुर्ला येथील शिव मंदिराला भेट देण्याची संधी मिळेल.

मंदिरापासून धबधब्यापर्यंतचा मार्ग घनदाट जंगल, खळाळणारे ओढे, विविध पक्षी आणि फुलपाखरे यांनी वेढलेला असून, निसर्गाच्या सान्निध्यात एक मनमोहक अनुभव देतो. धबधब्याचे थंडगार आणि स्वच्छ पाणी एका शांत कुंडात कोसळते, जिथे ट्रेकर्स ताजेतवाने होण्यासाठी डुबकीचा आनंद घेऊ शकतात.

प्रवासाचे नियोजन आणि शुल्क

सुमारे ९० मिनिटांचा ट्रेक मध्यम स्वरूपाचा आव्हानात्मक असून, चांगल्या शारीरिक स्थितीतील लोकांसाठी तो अविस्मरणीय देणार आहे. ही मोहीम साहसी असल्याने निसर्गप्रेमी आणि ट्रेकिंग उत्साही लोकांसाठी ही परफेक्ट ठरेल. या ट्रेकिंग मोहिमेसाठी प्रति व्यक्ती १४०० रुपये शुल्क आकारले जाईल, ज्यात वाहतूक, मार्गदर्शक सेवा आणि दुपारच्या जेवणाचा समावेश आहे.

सहभागींच्या सोयीसाठी वाहतुकीची व्यवस्था करण्यात आली आहे. या बसेस म्हापसा रेसिडेन्सीतून सकाळी ७:०० वाजता आणि मडगाव रेसिडेन्सीतून सकाळी ६:४५ वाजता सुटतील. पणजी येथील पर्यटन भवन येथे सकाळी ७:३० वाजता रिपोर्टिंगची वेळ निश्चित केली आहे. जुने गोवा, बाणास्तारी, फार्मागुडी आणि फोंडा येथेही पिक-अप पॉईंट्स उपलब्ध असतील.

निसर्गाचा आदर करा आणि नियमांचे पालन करा

सहभागींना अतिरिक्त कपडे, रेनवेअर, ट्रेकिंग शूज, स्नॅक्स आणि दुर्बिण सोबत ठेवण्याचे आवाहन करण्यात आले आहे. अभयारण्याच्या परिसरात धूम्रपान आणि मद्यपान करण्यास सक्त मनाई आहे. तसेच, निसर्गाचा आदर करण्याचे आणि अभयारण्य परिसरात कचरा न टाकण्याचे किंवा प्लास्टिकचा वापर टाळण्याचे आवाहनही सर्वांना करण्यात आले आहे.

पावसाळ्यात गोव्याच्या अंतर्गत भागांमध्ये निसर्ग-आधारित आणि साहस पर्यटनाला चालना देण्यासाठी GTDC च्या या प्रयत्नांचा हा एक भाग आहे. यामुळे स्थानिकांनाही रोजगाराच्या संधी मिळतात आणि गोव्याची अप्रतिम नैसर्गिक विविधता जगासमोर येते.