Goa TCP: झोन बदलावर पुर्नविचार करावा; टाऊन प्लॅनरना निवेदन सादर

सासष्टी: नगर नियोजन कायद्याच्या ३९ए कलमाखाली झोन बदलाला वाढता विरोध होत आहे. गोंयच्या फुडले पिळगेखातीर संस्थेने आक्षेप घेतले असून त्याची प्रत नगर नियोजन खात्याला पाठविले आहेत. ‘गोंयच्या फुडले पिळगेखातीर’ संस्थेचे अध्यक्ष जॅक मास्कारेन्हस यांनी मुख्य टाऊन प्लॅनरची भेट घेऊन त्यांना आक्षेप घेतलेले निवेदन सादर केले.

सरकारच्या अधिसूचनेप्रमाणे २०२१च्या क्षेत्रीय आराखड्यातील नियम चारचा उपनियम दोन प्रमाणे जवळ जवळ २२ मालमत्त्यांवर परिणाम होणार आहे. त्यातील ५ कुंडई व १५ उसगावातील आहेत. गेल्या महिन्यात गोंयच्या फुडले पिळगेखातीर संस्थेने आक्षेप घेणारी निवेदने सादर केली होती. ज्या २२ मालमत्तांवर परिणाम होणार आहे, त्यांना या कायद्यातुन वगळावे अशी विनंती करुन झोन बदलावर परत एकदा पुर्नविचार करावा अशी मागणी या संस्थेने केली आहे.

दरम्यान कुडतरीचे आमदार आलेक्स रेजिनाल्ड लॉरेन्स यांच्या मार्गदर्शनाखाली कुडतरीतील नागरीकांनी दक्षिण गोवा जिल्हाधिकारी आश्विन चंद्रू (आयएएस) यांची भेट घेतली व सर्वे नंबर ४४९/० व १८/२ या जागा नो डेव्हलपमेंट स्लोप मधून सेटलमेंट झोन मध्ये समावेश करण्यास विरोध करणारे निवेदन सादर केले. या वेळी कुडतरीचे सरपंच आलसिन्हा डिसिल्वा व पंच सदस्य उपस्थित होते. यापूर्वी २७ एप्रिल रोजी जिल्हाधिकाऱ्यांना कुडतरी पंचायतीने निवेदन देऊन नगर नियोजन खात्याच्या ३९ए कलमात झोन बदल करण्यास आक्षेप घेतला होता. हे त्यांच्या निदर्शनास आणून देण्यात आले.

...तर वायनाडसारखी स्थिती उद्‌भवेल!

फेब्रुवारीतील ग्रामसभेतही झोन बदलास विरोध करणारा ठराव मंजूर झाला होता. जर या मालमत्तांचा सेटलमेंट झोनमध्ये समावेश केला तर वायनाडप्रमाणे स्थिती इथेही उद्‍भवण्याची शक्यता आहे,असे आमदार आलेक्स रेजिनाल्ड यांनी सांगितले.