Goa Government Job : गोव्यात यापुढे नोकरभरती आयोगामार्फतच होणार

Goa Government Job : राज्यात यापुढे होणारी नोकरभरती ही सरळ अथवा शिफारशीने न करता गोवा राज्य लोकसेवा आयोगामार्फतच केली जाईल. यासाठी आयोगाबरोबरच मनुष्यबळ विकास महामंडळाची मदत घेतली जाणार असून ही प्रक्रिया केंद्र सरकारने घालून दिलेल्या भरती प्रक्रियेनुसार करण्यात येईल अशी माहिती राज्याचे मुख्यमंत्री डॉ. प्रमोद सावंत यांनी दिली.

मुख्यमंत्री म्हणाले, ‘राज्यात विविध खात्यांमध्ये अनेक पदे रिक्त आहेत. ही पदे भरण्याची प्रक्रिया लवकरच सुरू करण्यात येईल. मात्र, यासाठी राज्य लोकसेवा आयोगाने घालून दिलेल्या शिफारशींची काटेकोर पद्धतीने अंमलबजावणी केली जाईल. याशिवाय ही संपूर्ण प्रक्रिया या स्वतंत्र आयोगामार्फत केली जाईल. खात्यांतर्गत भरतीसाठी आवश्यकता पत्रे आणि रिक्त पदांचा तपशील आयोगाला सादर करण्यात येईल. आयोग त्याप्रमाणे रिक्त पदांची उद्घोषणा करून परीक्षा, मुलाखत आणि निकाल या पद्धतीने भरून ती राज्य सरकारला सादर करेल.’

दरम्यान, यापूर्वी नोकरभरतीमध्ये काही चुकीच्या घटना घडल्याच्या राज्य सरकारच्या निदर्शनास आले आहे. याशिवाय गेल्या विधानसभा निवडणुकीपूर्वी नोकरभरतीमध्ये मोठ्या प्रमाणामध्ये आर्थिक घोटाळा झाल्याची प्रकरणे समोर आली होती, त्यामुळे सरकारने भरतीसाठी यावेळेस कडक उपाययोजना राबविण्याचे धोरण अवलंबिले आहे.