Goa Crime: ‘सोनारा’ने घातला 23 लाखांचा गंडा! अनेकांची फसवणूक; पेडणे पोलिसांकडून गुन्हा दाखल

Dhargalim Gold Cash Theft Case

पेडणे: धारगळ येथे २३ लाख ३६ हजार रुपये किमतीचे सोने, रोख रक्कम घेऊन फरारी असल्याच्या आरोपावरून पेडणे पोलिसांनी एका सोनारावर गुन्हा दाखल केला आहे.

धारगळ-पेडणे येथील सोनार रुत्विक पांडुरकर (२२) यांनी दिलेल्या तक्रारीत म्हटले आहे की, सप्टेंबर ते नोव्हेंबर यादरम्यान धारगळ येथे राहत असलेला व मूळचा बेळगाव येथील सोनार संशयित राजू याच्याकडे आपणाकडील सोन्याचे जुने दागिने वितळवून नवीन दागिने करण्यासाठी दिले होते.

तक्रारदाराने १८ लाख १६ हजार रुपयांचे जुने सोन्याचे दागिने आणि रोख ५ लाख २० हजार रुपयांचे नवीन सोन्याचे दागिने तयार करण्यासाठी संशयिताकडे दिले होते. तसेच याव्यतिरिक्त इतर लोकांनीही अशाचप्रकारे जुने सोन्याचे दागिने वितळवून नवीन दागिने करण्यासाठी संशयिताकडे दिले होते.

या सगळ्याची मिळून किंमत २३ लाख ३६ हजार होते. पेडणे पोलिसांनी भा.दं.वि. कलम ३१६ (२) आणि ३१८ (४) अन्वये गुन्हा दाखल केला असून पोलिस निरीक्षक सचिन लोकरे यांच्या मार्गदर्शनाखाली उपनिरीक्षक विवेक हळर्णकर पुढील तपास करत आहेत.