Goa Crime: मुँह में राम, बगल में छुरी! साधूच्या वेशात येऊन 8.50 लाखांचे दागिने केले लंपास, सोलापुरातून दोघांना अटक

Goa Parcem Theft Case

मोरजी: पार्से येथील अमिता अनंत नाईक यांच्या घरातील साडेआठ लाख रुपयाचे किमती सोन्याचे दागिने फसवून नेल्याबद्दल विजय शिंदे व भीमराव शिंदे या सोलापूर येथील संशयितांना मांद्रे पोलिसांनी अटक करून त्यांच्याकडून दागिने जप्त केले.

चोनसाई, पार्से येथील अमिता अनंत नाईक यांच्या निवासस्थानी ११ फेब्रुवारी रोजी सकाळी साडेआठ वाजता साधू बनून दोघे आले. आपण देवाचे दूत असल्याचा दावा करत घरात विधी करण्याची विनंती त्यांनी अमिता यांना केली.

देवावरील श्रद्धेने अमिता यांनी विधी करण्यास मान्यता दिली. दोघांनी विधी करण्यास सुरवात केली. त्यावेळी तुमच्याकडे जेवढे दागिने असतील ते देवाला थोड्यावेळासाठी अर्पण करा असे सांगितले. तिने श्रद्धा ठेवून दागिने त्यांच्या हवाली केले.

त्यानंतर सर्व दागिने घेऊन ते पसार झाले. याबाबत अमिता नाईक यांनी मांद्रे पोलिसांकडे तक्रार नोंदवली. पोलिस निरीक्षक शेरीफ जेकीस यांच्या नेतृत्वाखाली पथक तयार करून संशयितांचा माघ काढण्यात आला. कोळेगाव मोहोळ रेल्वे स्टेशन, सोलापूर या ठिकाणी या दोन्ही संशयितांना मुद्देमालासह पोलिसांनी ताब्यात घेतले व गोव्यात आणून रितसर अटक केली.