World Food Day: अभिमान! 'गोवन' अन्नपदार्थांचा टपाल खात्याकडून गौरव

पणजी: दरवर्षी आजच्या दिवशी, म्हणजे १६ ऑक्टोबर रोजी जागतिक अन्न दिन साजरा केला जातो. भूक आणि कुपोषण यापासून जग मुक्त व्हावे हे स्वप्न साकार करण्यासाठी आपली सर्वांची भूमिका आज महत्त्वाची बनली आहे. अन्नविषयक संकटाच्या वेळी आपण आपल्या शाश्वत सवयी (शाश्वत शेती आणि अन्न उत्पादन) दूर सारू नयेत याचे भान आम्हाला हा दिवस देतो.

'उत्तम भविष्य आणि जीवनासाठी अन्नाचा अधिकार' हा यंदाच्या जागतिक अन्न दिनाचा संदेश आहे. हा संदेश पोषणाच्या मूलभूत मानवी हक्कांवर भर देतो आणि आपले वर्तमान आणि भविष्य घडवण्यात अन्नाची असलेली महत्त्वाची भूमिका अधोरेखित करतो.

भारतातील इतर राज्यापेक्षा गोव्यातील लोकांच्या खाण्याच्या सवयी वेगळ्या आहेत. वेगळे मसाले, वेगळे पदार्थ आणि बनवण्याच्या पद्धतीतही आगळेपणा आहे. यापैकी काही अन्नपदार्थांना भारतीय तसेच गोवा टपाल विभागाने आपल्या साहित्यावर स्थान देऊन त्यांचा गौरव केला आहे.