Goa News : देशाच्या विकासात गोव्याचेही योगदान : आलेक्स सिक्वेरा

Goa News : सासष्टी, भारताने जगातील इतर देशांच्या तुलनेत सर्व क्षेत्रामध्ये चांगली प्रगती केली असून देशाच्या विकासात गोव्याचेही योगदान महत्त्वाचे असल्याचे पर्यावरण मंत्री आलेक्स सिक्वेरा यांनी सांगितले.

७५ व्या प्रजासत्ताक दिनानिमित्त मडगाव येथील दक्षिण गोवा जिल्हाधिकारी संकुलात ध्वजारोहण केल्यावर ते बोलत होते.

भारताबद्दलची विश्र्वासार्हता इतर देशांमध्ये वाढली आहे. पंतप्रधान नरेंद्र मोदी यांच्या मार्गदर्शनाखाली भारताने सर्वच क्षेत्रामध्ये भरारी मारलेली आहे. पंतप्रधान मोदी महिला, युवक, शेतकरी व गरिबांचे जीवनमान उंचावण्यासाठी प्रयत्न करीत आहेत असेही सिक्वेरा यांनी सांगितले.

यावेळी अजित वेळीप व संदेश गावकर या सुरक्षा रक्षकांचा सत्कार करण्यात आले. या सोहळ्याला नावेलीचे आमदार उल्हास तुयेकर, स्वातंत्र्य सैनिक, नागरिक व सरकारी अधिकारी उपस्थित होते.

समान नागरी कायदा हे गोव्याचे वैशिष्ट्य

गोव्याने पर्यटन, क्रीडा या क्षेत्रामध्ये चांगली प्रगती केली आहे. गोव्यामध्ये औद्योगीक व कृषी क्षेत्रामध्ये नवीन योजना कार्यान्वित केल्या आहेत. समान नागरी कायदा हे गोव्याचे वैशिष्ट्य असल्याचे सिक्वेरा यांनी सांगितले.