Goa ZP Election: जिल्हा पंचायत निवडणुकीसाठी आरक्षण जाहीर! मुख्यमंत्र्यांच्या समर्थकांस धक्का; कोणते मतदारसंघ राखीव? वाचा..

पणजी: विधानसभा निवडणुकीची ‘उपांत्य फेरी’ म्हणून समजल्या जाणाऱ्या जिल्हा पंचायत निवडणुकीसाठी अखेर आरक्षण जाहीर झाले आहे. आरक्षण जाहीर होताच इच्छुक उमेदवारांनी सत्ताधारी आमदारांकडे उमेदवारीसाठी संधान बांधण्यास सुरवात केली आहे तर विरोधकांनीही जशास तसा उमेदवार देण्यासाठी चाचपणी सुरू केली आहे. त्यामुळे या निवडणुकीची उत्सुकता वाढली आहे.

जाहीर झालेल्या आरक्षणामुळे अनेकांची कोंडी झाली असून काहींवर दुसरे मतदारसंघ शोधण्याची वेळ आली आहे. महिलांना १८ मतदार संघ राखीव जाहीर झाले असून त्यात उत्तर आणि दक्षिण गोव्यात प्रत्येकी ९ मतदार संघांचा समावेश आहे.

राज्य निवडणूक आयोगाने (एसईसी) उत्तर आणि दक्षिण गोव्यात होणाऱ्या जिल्हा पंचायत (झेडपी) निवडणुकांसाठी शुक्रवारी अधिकृतपणे आरक्षण यादी जाहीर केली. त्यात महिलांना १८ तर ओबीसींना १३ मतदार राखीव करण्यात आले आहेत.

उत्तर गोवा जिल्हा पंचायतीसाठी २५ पैकी १५ मतदारसंघांत, तर दक्षिण गोवा जिल्हा पंचायतीसाठी २५ पैकी १७ मतदारसंघांत आरक्षण पडले आहे. एकूण ३२ मतदारसंघांत आरक्षण असून, उर्वरित १८ ठिकाणी सर्वसाधारण गटातील जागेवर उमेदवार उभे राहू शकणार आहेत. त्यात उत्तर गोव्यात दहा, तर आठ दक्षिण गोव्यातील मतदारसंघ खुले आहेत.

जाहीर झालेल्या आरक्षणामुळे ८० टक्के विद्यमान सदस्यांचे मतदारसंघ राखीव झाल्याचे दिसते. दरम्यान, महिला, अनुसूचित जाती (एससी), अनुसूचित जमाती (एसटी) आणि इतर मागासवर्गीय (ओबीसी) यांना प्रतिनिधित्व निश्चित करण्यासाठी हे आरक्षण घटनात्मक तरतुदींनुसार असल्याचे आयोगाने नमूद केले आहे. ही निवडणूक लढवणाऱ्या राजकीय पक्षांनी आणि स्वतंत्र उमेदवारांनी अर्ज दाखल करताना वरील आरक्षणांचे पालन करणे आवश्यक असल्याचे आयोगाने नमूद केले आहे.

आरक्षणामुळे अनेकांची कोंडी

हरमल-महिला, मोरजी-महिला (ओबीसी), तोरसे- ओबीसी, कोलवाळ- महिला, हणजुणे-ओबीसी, कळंगुट-महिला, रेईश मागूस-महिला, सांताक्रूझ-महिला (ओबीसी), ताळगाव-एसटी, चिंबल-महिला, सेंट लॉरेन्स-महिला (ओबीसी), मये-महिला, पाळी-ओबीसी, होंडा-ओबीसी, केरी-एससी. याशिवाय धारगळ, शिवोली, हळदोणा, सिरसई, सुकूर, पेन्ह दी फ्रान्स, खोर्ली, लाटंबार्से, कारापूर-सर्वण आणि नगरगाव हे मतदारसंघ सर्वसाधारण गटातील उमेदवारांसाठी खुले आहेत.

उसगाव-गांजे-महिला, कुर्टी-एसटी, वेलिंग-प्रियोळ-महिला, कवळे-ओबीसी, बोरी-महिला, शिरोडा-महिला, राया-एसटी, नुवे-ओबीसी, दवर्ली- ओबीसी, गवंडाळी-एसटी, कुडतरी-ओबीसी, नावेली-महिला (ओबीसी), सावर्डे-एसटी, रिवण-महिला (एसटी), बार्से-महिला, खोला-महिला (ओबीसी) आणि कुठ्ठाळी- महिला. याशिवाय बेतकी-खांडोळा, कोलवा, वेळ्ळी, बाणावली, धारबांदोडा, शेल्डे, पैंगीण आणि सांकवाळ हे मतदारसंघ सर्वसाधारण गटातील उमेदवारांसाठी खुले ठेवण्यात आले आहेत.

काहींवर मतदारसंघ बदलण्याची वेळ

उत्तर गोवा जिल्हा पंचायतीचे माजी अध्यक्ष तसेच एसटी समाजातील नेते धाकू मडकईकर यांचा सेंट लॉरेन्स मतदारसंघही महिला ओबीसींसाठी राखीव झाला आहे. याशिवाय माजी जिल्हा पंचायत अध्यक्ष शंकर चोडणकर यांचाही पत्ता कट झाला आहे. त्यामुळे मडकईकर यांना पुन्हा जिल्हा पंचायतीत जायचे झाल्यास नवा मतदारसंघ शोधावा लागेल, अन्यथा सेंट लॉरन्सेमध्ये पक्ष जो उमेदवार देईल, त्याला निवडून आणण्याची जबाबदारी स्वीकारावी लागेल. तसेच सदस्या देवयानी गावस यांचा केरी मतदारसंघ हा अनुसूचित जातीसाठी राखीव झाला असल्याने त्या पुन्हा निवडणुकीत उतरणार असल्यास त्यांना दुसरा मतदारसंघ शोधावा लागेल. १३ डिसेंबर रोजी होणाऱ्या निवडणुकीसाठी आता उत्सुकता वाढली आहे.

मुख्यमंत्र्यांच्या समर्थकांस धक्का

मुख्यमंत्री प्रमोद सावंत यांचे खंदे समर्थक गोपाळ सुर्लकर यांचा पाळी मतदारसंघ आता ओबीसींसाठी राखीव झाला आहे. त्यामुळे याठिकाणी आता मुख्यमंत्री कोणाला उमेदवारी देणार याकडे सर्वांचे लक्ष असेल. याशिवाय खोर्ली मतदारसंघ खुला राहिल्याने केंद्रीय राज्यमंत्री श्रीपाद नाईक यांचे सुपुत्र तथा माजी जिल्हाध्यक्ष सिद्धेश नाईक यांच्या उमेदवारीचा मार्ग मोकळा झाला आहे. परंतु नाईक हे निवडणुकीत उतरणार की नाही, हे अद्यापि स्पष्ट नाही. दक्षिण गोव्यातही आरक्षणाचा फटका काही विद्यमान सदस्यांना बसलेला आहे.

काब्राल समर्थकांना दिलासा

आरक्षित मतदारसंघांची यादी जाहीर झाल्‍यानंतर माजी मुख्‍यमंत्री बाबू कवळेकर यांच्‍या समर्थकांना जबरदस्‍त धक्‍का बसल्‍याचे दिसून आले. तर जवळच्‍या मतदारसंघातील आमदार निलेश काब्राल यांच्‍या समर्थकाला दिलासा मिळाला. रिवण मतदारसंघ एसटी महिलासाठी राखीव झाल्‍याने मंत्री सुभाष फळदेसाई यांचे समर्थक उमेदवार असलेल्‍या विद्यमान उमेदवाराचीही विकेट गेल्‍याचे स्‍पष्‍ट झाले आहे.