Goa Weather: सौम्य थंडीची चाहूल, कोरडे हवामान; वेधशाळेने सांगितला पुढील चार दिवसांचा अंदाज

Weather in Goa

पणजी: राज्यात मागील दोन दिवसांपासून पुन्हा सौम्य थंडी पडत आहे. पुढील चार दिवस राज्यातील हवामान कोरडे राहणार असून सौम्य थंडी पडणार असल्याचे गोवा वेधशाळेने म्हटले आहे. बुधवारी राज्यात कमाल ३३.५ अंश सेल्सिअस तर किमान २०.३ अंश सेल्सिअस तापमानाची नोंद करण्यात आली.

राज्यात मागील काही दिवसांपासून उष्म्यात मोठ्या प्रमाणात वाढ झाली होती. परंतु आता मागील दोन-तीन दिवसांपासून सौम्य थंडी जाणवत आहे. परंतु दुपारी मात्र मोठ्या प्रमाणात उष्मा जाणवत असल्याने नागरिक हैराण आहेत.

पुढील ४८ तासांत राज्यातील कमाल तापमान ३३ तर किमान तापमान २१ अंश सेल्सिअसपर्यंत राहण्याची शक्यता वर्तविण्यात आली आहे. तसेच पहाटे धुके आणि दव पडण्याची शक्यता वर्तविण्यात आली आहे. राज्यात थंडीचा अधिक प्रभाव प्रामुख्याने ग्रामीण तसेच घाटालगतच्या भागात जाणवत आहे.

रुग्णांत वाढ!

पहाटे आणि रात्री थंडी आणि दुपारी मोठ्या प्रमाणात वाढणाऱ्या उष्म्यामुळे थंडी, पडशाच्या रूग्णांमध्ये वाढ होत आहे त्यामुळे लहान मुले आणि खासकरून ज्येष्ठ नागरिकांची योग्य काळजी घ्यावी, योग्य आहार घ्यावा, असे आवाहन आरोग्य विभागाकडून करण्यात येत आहे.