Goa Rain News: दिवाळी सरली तरीही राज्यातील जनतेचा आवडता सण, 'व्हडली दिवाळी' म्हणजेच तुळशी विवाह झाल्याशिवाय गोव्यातील सणाचा उत्साह कमी होत नाही. सध्या हेच तुळशीचं लग्न अगदी तोंडावर असताना शुक्रवारी दिवसभर पडलेल्या बिगर मोसमी पावसामुळे नागरिकांच्या उत्साहावर पाणी फिरले. तुळशी विवाहाच्या तयारीच्या कामांमध्ये मोठा अडथळा निर्माण झाला, मात्र आता हवामान खात्याने स्थानिकांना आनंदाची बातमी दिली आहे.
शुक्रवारी दिवसभर पाऊस सुरू होता, तर शनिवारी देखील काही भागांत सकाळपासून पावसाच्या तुरळक सरी कोसळल्या. मात्र, याच दरम्यान हवामान विभागाने एक दिलासादायक अंदाज वर्तवला आहे.
हवामान खात्यानुसार, पुढील सात दिवस राज्यात कुठेही मोठ्या पावसाची शक्यता नाही. त्यामुळे रविवारच्या (ता. २) तुळशी विवाह समारंभाला पावसाचा कोणताही अडथळा येणार नाही, अशी आशा आहे. पावसामुळे खोळंबलेली तुळशी वृंदावन रंगवणे आणि इतर सजावटीची कामे आता नागरिकांना त्वरित पूर्ण करता येणार आहेत.
हा बिगर मोसमी पाऊस केवळ सणाच्या तयारीलाच नाही, तर शेतकऱ्यांसाठीही मोठे नुकसान घेऊन आला आहे. विशेषतः पेडणे तालुक्यातीलशेकडो शेतकऱ्यांना यंदा प्रथमच या अवकाळी पावसाचा मोठा फटका बसला आहे. अनेक शेतांमध्ये पाणी साचल्यामुळे उभी पिके आडवी पडली, ज्यामुळे काढणीचे मोठे नुकसान झाले. काही ठिकाणी तर पिके पूर्णपणे खराब न होता, ती पुन्हा रुजून बहरताना दिसत आहेत, ज्यामुळे शेतकऱ्यांमध्ये संभ्रम निर्माण झाला आहे.
नुकसानीची पाहणी करण्यासाठी कृषी खात्याचे धिकारी गावागावातील शेतकऱ्यांच्या शेतात जाऊन पाहणी करत असले तरीही काढणीच्या वेळी पीक खराब झाल्यामुळे शेतकऱ्यांची नाराजी अद्याप कमी झालेली नाही.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.