Goa Weather Update: राज्यात यलो अलर्ट; आज मध्यम स्वरूपाचा पाऊस

Goa Weather Update राज्यात २७ जुलैनंतर पावसाने दडी मारली होती. मात्र, गेल्या दोन दिवसांपासून काही प्रमाणात जोर धरला आहे.

राज्यात रविवारी हवामान खात्याच्या गोवा वेधशाळेने यलो अलर्ट जारी केला असून मध्यम स्वरूपाच्या पावसाची शक्यता वर्तविण्यात आली आहे.

गेल्या २४ तासांत राज्यात एकूण ४४.३ मिलीमीटर म्हणजेच सुमारे १.७४ इंच पावसाची नोंद करण्यात आली आहे.

आतापर्यंत राज्यात २,७५२.५ मि.मी. म्हणजेच १०८ इंच पावसाची नोंद झाली असून सामान्य पावसाच्या तुलनेत आतापर्यंत ६ टक्के अधिक पाऊस पडला आहे.

वेधशाळेच्या मते, पुढील पाच दिवस राज्यातील काही भागांत तुरळक पावसाची शक्यता असून २७ ऑगस्टपर्यंत वातावरण ढगाळ राहण्याची शक्यता आहे. गेल्या २४ तासांत सर्वाधिक ७४ मि.मी. पाऊस पणजी आणि दाबोळी येथे पडला असून त्याखालोखाल पेडणेत ७२ मि.मी., मुरगाव ६४ मि.मी. म्हापसा ३८ मि.मी., तर सर्वांत कमी पाऊस १४.८ मि.मी. सांगे येथे पडल्याचे गोवा वेधशाळेने म्हटले आहे.