अभिमानास्पद! गोमंतकीय कथाकार डॉ. प्रकाश पर्येकरांच्या ‘आर्या’ सिनेमाची बॉलीवूड चित्रपट महोत्सवामध्ये निवड

Aarya Film सत्तरीचे सुपुत्र, नामवंत लेखक, कथाकार डॉ. प्रकाश पर्येकर यांच्या ‘सैम सोबित नेहा’ या कोकणी कथेवर आधारित ‘आर्या : डॉटर ऑफ भारत’ या मराठी चित्रपटाची नॉर्वे येथील बॉलीवूड चित्रपट महोत्सवामध्ये निवड झाली आहे.

स्वातंत्र्यदिनी या चित्रपटाचा ट्रेलर रिलीज झाला असून तो सर्वांच्या पसंतीस उतरला आहे. ‘एसएस’ फिल्म प्रॉडक्शन प्रस्तुत, पुणे येथील शरद आणि अंजली पाटील यांनी या चित्रपटाची निर्मिती केली असून राष्ट्रीय पुरस्कार विजेते नितीन भास्कर यांनी त्याचे दिग्दर्शन केले आहे.

ग्रामीण जीवन आणि लोकसंस्कृतीचे दर्शन या चित्रपटातून होते. वीरभद्र, रणमाले, शिगमोत्सव, चोरोत्सव, रोमटामेळ आदी लोककलांचाही त्यात समावेश आहे.

२२ दिवसांच्या या चित्रीकरणात सत्तरीतील रिवे, गोळावली, पाली, ठाणे, धावे, तार, जुने गोवे, ताळगाव, दोना पावला, पणजी या भागांचा समावेश आहे. चित्रपटाची पटकथा डॉ. प्रकाश पर्येकर आणि श्रीकांत भिडे आहे.

गोमंतकीय कलाकारांचा सहभाग

या चित्रपटात ‘आर्या’ या मुलीची भूमिका हिरिका पाटील (पुणे), आईची भूमिका अभिनेत्री अमृता फडके, मुंबईचे राहुल बोडस (वडील), शीतल सोनावणे, शुभांगी दामले, शशांक शेंडे यांच्या प्रमुख भूमिका आहेत. तसेच श्वेता कर्पे, माधुर्य मोरजकर, कवीश बेतकीकर, अदिती कुंभार, सानवी माशेलकर, सृष्टी गावकर, वेदा देसाई, मेघा हळदणकर, श्वेता गडकर, विवेक शिरवईकर, नविता गावस, विश्वनाथ गावस या गोमंतकीय कलाकारांची झलक पाहायला मिळणार आहे.

हा चित्रपट माझ्या जीवनावर आधारित आहे. सप्टेंबरमध्ये नाॅर्वेतील महोत्सवात गोव्याचा हा चित्रपट दाखविला जाणार असल्याने खूप आनंद होत आहे. इफ्फीतही ‘इंडियन पॅनोरमा’ विभागासाठी आम्ही तो पाठविला आहे. निवड झाल्यानंतर या चित्रपटाचा प्रीमियर इफ्फीत करणार आहोत. - प्रकाश पर्येकर, लेखक-कथाकार.