Goa Unseasonal Rain: इफ्फी, तुळशी विवाहाच्या धामधूमीत 'अवकाळी'ची एंट्री; वरुणराजाच्या आगमनाने गोवेकरांची धांदल

Goa Unseasonal Rain: गोव्यात सध्या शेतीची कामे अर्ध्यावर आली असून कालपासून (गुरुवारपासून) तुळशी विवाह सणालाही सुरुवात झाली आहे. त्यातच राजधानी पणजीत इफ्फीचीही धामधूम सुरु आहे.

या सगळ्या सोहळ्याच्या वातावरणात शुक्रवारी वरुणराजाने एंट्री केल्याने एकच धावपळ उडाली. उत्तर गोव्यातील वाळपई आणि लगतच्या परिसरात तुफान अवकाळी बरसला.

मागील 2-3 दिवसांपूर्वी हवामान खात्याने गोव्यासाठी यलो अलर्ट जारी केला होता. राज्यात 22 ते 26 नोव्हेम्बरपर्यंत वादळी वाऱ्यासह पाऊस बरसण्याची शक्यता हवामान खात्याने वर्तवली होती. त्यानुसार आज म्हणजेच 24 नोव्हेम्बरला संध्याकाळी 3 ते 4 च्या दरम्यान वाळपई परिसरात तुफान पाऊस बरसला.

सध्या गोव्याच्या शहरी भागासह ग्रामीण भागातही तुळशी विवाहाची तयारी सुरु असून अंगण शेणाने सारवून, रांगोळी, पणत्यांसह सजावट केलेली दिसून येतेय.

मात्र अवकाळी बरसल्याने लोकांची तारांबळ उडाली. सकाळ पासून ढगाळ वातावरण असून प्रचंड उष्माही जाणवत होता. अखेर 4 च्या सुमारास वाळपईसह लगतच्या परिसरात जोरदार अवकाळी पावसाचं आगमन झालं.