Tragic Death: मायेच्या ओढीने 'तो' घरी आला, आईची विचारपूस करतानाच शॉक लागला; वेरेत युवकाचा मृत्यू

म्हापसा: होंडा, सत्तरी येथे वीजेचा धक्का लागून लाईनमन मृत्यू झाल्याची घटना ताजी असताना आंबेखंड वेरे येथून धक्कादायक घटना समोर आली आहे. आईला भेटण्यासाठी आलेल्या युवकाचा वीजेचा शॉक लागून मृत्यू झाला आहे. गुरुवारी (२२ मे) सायंकाळी सहाच्या सुमारास ही घटना घडली.

रवी बिरादर (३६, रा. सुकूर पर्वरी) असे या दुर्घटनेत मृत्यू झालेल्या युवकाचे नाव आहे. रवी गुरुवारी सायंकाळी वृद्ध आईला भेटण्यासाठी आंबेखंड वेरे येथे आला होता. आईची विचारपूस करत असताना रवीचा हात दाराशेजारी असलेल्या वीजेच्या तारेला लागला. वीजेच्या झटक्याने तो खाली कोसळला.

मुलगा रवी खाली कोसळताच आईने आरडोओरडा करण्यास सुरुवात केली. स्थानिकांनी घटनास्थळी दाखल होत रवीला गोमेकॉत दाखल केले. पण, डॉक्टरांनी त्याला मृत घोषित केले. रवीची वृद्ध आई एकटीच घरी राहते, त्यामुळे तो वरचेवर आईला भेटायला यायचा असे स्थानिकांनी सांगितले.

सत्तरीत वीजेचा धक्का लागून लाईनमनचा मृत्यू

होंडा, सत्तरीत वीजेचा धक्का लागून लाईनमनचा मृत्यू झाल्याची घटना २० मे रोजी घडली. चंद्रू गांवकर (मोर्ले, सत्तरी) असे या वीजेचा धक्का लागून मृत्यू झालेल्या लाईनमनचे नाव आहे. यात सर्वेश गांवकर हा कर्मचारी जखमी झाला आहे.