Goa Traffic News: ट्रॅफिक पोलिसांना पाहताच दुचाकीवरील तरूणाचा यु टर्न; पण पोलिसांनाच जाऊन धडकला... गाडीत बीअरचा कॅन

Goa Traffic Police News: पणजी स्टँड परिसरात रविवारी एक मजेशीर प्रकार घडला. येथील चौकात ट्रॅफिक पोलिस नेहमीप्रमाणे वाहतूक नियंत्रणाचे काम करत होते. तेव्हा एका बाजूने आलेल्या तरूणाने ट्रॅफिक पोलिसांना पाहताच पळून जाण्याचा प्रयत्न केला. या नादात तो एका ट्रॅफिक पोलिसालाच जाऊन धडकला. आणि पडला. अखेर पोलिसांनीच त्याला उचलून सुरक्षित स्थळी आणले.

या किरकोळ अपघातात तरूणाच्या गाडीचे थोडेफार नुकसान झाले आहे तसेच त्यालाही थोडेफार खरचटले आहे. दरम्यान, त्याच्या दुचाकीच्या पुढील कप्प्यात बीअरचा कॅन आढळून आला आहे. या तरूणानेही थोडेफार मद्यप्राशन केल्याचा संशय आहे.

गेल्या काही काळात गोव्यात ड्रंक अँड ड्राईव्हचे अनेक प्रकार समोर आले आहेत. बाणास्तरीतील अपघातानंतर तर गोव्यात याविरोधात जोरजोरात बोलले जात आहे. त्यातून पोलिसांवरही ड्रंक अँड ड्राईव्ह करणाऱ्यांवर कारवाईचा मोठा दबाव आहे.

पोलिस कारवाईच्या भीतीनेच हा तरूण घाबरला असण्याची शक्यता आहे. त्यातून त्याने गाडी वेगाने चालवण्याच्या नादात पोलिसाला धडक दिली. दरम्यान, तो स्थानिक तरूण असून आता पोलिस त्याची चौकशी करत आहेत.