Drunk and Drive: सावधान! नववर्षाच्या स्वागतासाठी गोव्यात जाताय? मद्यपी वाहनचालकांवर असणार बारीक नजर

Strict action on drunk drivers in Goa

फातोर्डा: नववर्षाच्या स्वागतासाठी महाराष्ट्र, कर्नाटक, मध्य प्रदेश, हरियाणा, दिल्लीसह इतर राज्यांतील पर्यटक आपली खासगी वाहने घेऊन गोव्यात ३१ डिसेंबरला नवे वर्ष साजरे करण्यासाठी येत असतात. गोव्यातील समुद्र किनारे हे त्यांचे खास आकर्षण आहे. त्यामुळे मध्यरात्री गोव्यातील समुद्र किनारे पर्यटकांनी फुलून जात असतात.

मात्र, या पर्यटकांकडून दारूच्या नशेत वाहने हाकली जातात अशा वाहनचालकांविरुद्ध कडक कारवाई करण्‍याचे संकेत कोलवा पोलिसांनी दिले असून अशा वाहनचालकांवर वाहतूक पोलिसांकडून बारीक लक्ष ठेवण्‍यात येणार असल्‍याची माहिती वाहतूक पोलिसांकडून मिळाली आहे.

नववर्षाला दोन दिवस बाकी असले तरी देशी तसेच विदेशी पर्यटक गोव्यात दाखल व्हायला सुरवातही झाली आहे. येत्या दोन दिवसांत त्यात आणखी भर पडणार आहे. त्यामुळे गोव्यातील वाहतुकीवर मोठा ताण येणार आहे. वाहने चालविणाऱ्या पर्यटकांची संख्याही मोठ्या प्रमाणात आहे. यावर रस्ता अपघात घडण्याची शक्यता नाकारता येत नाही.

यावर नियंत्रण ठेवण्यासाठी गोवा वाहतूक पोलिसांनी सर्वत्र जय्यत तयारी केली आहे. गोव्यातील मोक्याच्या ठिकाणी या पर्यटक वाहनचालकांची अल्कोमीटरने तपासणी करण्यात येणार आहे, अशी माहिती पोलिस सूत्रांकडून देण्यात आली आहे.

३५० पोलिस ठेवणार देखरेख

वार्का, कोलवा, बाणावली, पाळोळेसह इतर ठिकाणी मिळून दक्षिण गोव्‍यात एकंदरीत ३०० ते ३५० च्या आसपास वाहतूक पोलिस रस्त्यावर देखरेख ठेवणार असून अपघाताला कारणीभूत ठरणाऱ्या वाहनचालकांवर लक्ष ठेवणार आहेत. हे पोलिस ३१ डिसेंबर रोजी रात्री १० वाजल्‍यापासून पहाटे ५ वाजेपर्यंत कार्यरत राहणार आहेत, अशी माहिती वाहतूक पोलिस विभागाकडून प्राप्‍त झाली आहे.