Goa Taxi Meter: गोवा टॅक्सी सेवेबाबत महत्वाची बातमी! भाडे मीटर म्हणून 'ॲप'ला मान्यता; नियमांमध्ये सुधारणा

Goa taxi regulations

पणजी:राज्य सरकारने २० हजारपैकी १८ हजार टॅक्सींना डिजिटल मीटर बसविल्यानंतर भाडे मीटर म्हणून ॲपलाच मान्यता दिली आहे. जानेवारीत नियमांत सुधारणा करण्यासाठी त्याचा मसुदा जारी करून जनतेकडून सूचना व हरकती मागवल्या होत्या.

राज्य सरकारने गोवा मोटर वाहन नियमांमध्ये सुधारणा अधिसूचित केली असून, ॲप-आधारित टॅक्सी अ‍ॅग्रीगेटरसाठी भाडे मीटर म्हणून ॲपलाच मान्यता देण्यात आली आहे, जर ते एसएमएस/ई-मेलद्वारे इनव्हॉइस प्रदान करत असेल. यासंदर्भात सरकारने जानेवारी २०२५ मध्ये मसुदा सुधारणा जारी करून जनतेकडून सूचना आणि अभिप्राय मागवले होते.

"जर मोटरकॅब ॲप-आधारित अ‍ॅग्रीगेटर अंतर्गत कार्यरत असेल, तर या नियमाच्या उद्देशाने ॲपला भाडे मीटर म्हणून मान्यता दिली जाऊ शकते. तसेच, जर ॲपमध्ये एसएमएस/ई-मेलद्वारे इनव्हॉइस देण्याची सुविधा असेल, तर प्रिंटर बंधनकारक असण्याची आवश्यकता नाही, असे आज जारी केलेल्या अधिसूचनेत नमूद करण्यात आले आहे.

अंदाजानुसार, गोव्यात नोंदणीकृत असलेल्या सुमारे २० हजार टॅक्सींपैकी १८ हजारहून अधिक टॅक्सींमध्ये आधीच मीटर बसवण्यात आले आहेत.