पणजी : आगामी पर्यटन हंगाम सुरू होण्यापूर्वीच राज्‍यातील शॅकचे परवाने आणि नूतनीकरण परवाने दिले जातील, अशी माहिती पर्यटनमंत्री रोहन खंवटे यांनी दिली. राज्‍यातील पर्यटन हंगाम सुरू होण्यास अवघा दीड महिन्‍याचा अवधी उरला आहे. या पार्श्वभूमीवर शॅक वाटप धोरणाविषयी विचारले असता त्‍यांनी ही माहिती दिली. हंगामापूर्वीच शॅकच नूतनीकरण झाल्यास संबंधित व्‍यावसायिकांना सोयीचे होईल, असेही ते म्‍हणाले.
सप्टेंबर अखेरपर्यंत शॅक परवान्यांचे नूतनीकरण न केल्यास हा व्यवसाय सुरू होण्यास उशीर होईल. याबाबत शॅक ऑपरेटर्सच्‍या मागणीनुसार निर्णय घेण्यात असल्‍याचे मंत्री खंवटे यांनी सांगितले. गोवा किनारी विभाग व्‍यवस्‍थापन प्राधिकरणाकडून शॅकसाठी सीमांकन झाल्‍यानंतर परवाने दिले जातील. तसेच नूतनीकरणही केले जाईल. कारण सीमांकनाशिवाय कोणत्‍याही प्रकारचे कच्चे बांधकाम करता येत नसल्‍याचे ते म्‍हणाले.
राज्‍य सरकारने ठरविल्यानुसार समुद्र किनाऱ्यावरील शॅक परवान्यांना एक वर्षाची मुदतवाढ देण्यात आली आहे. शॅक ओनर्स वेल्फेअर सोसायटी (सॉस) चे सचिव जॉन लोबो यांनी सांगितले की, सप्टेंबरमध्ये परवान्यांचे नूतनीकरण झाल्यास ऑक्टोबरच्या सुरुवातीस शॅकचालकांना व्यवसाय सुरू करता येईल.
कळंगुट, बागा किनाऱ्यावर पर्यटकांची गर्दी
बहुतेक समुद्रकिनाऱ्यावरील शॅक देशी पर्यटकांमुळे चालतात. उत्तर गोव्‍यातील कळंगुट, बागा, हणजूण आदी किनाऱ्यांवर देशी पर्यटकांची अधिक गर्दी असते, असे लोबो यांनी सांगितले. काही वेळा अचानकपणे पडणाऱ्या पावसामुळे हंगाम सुरू होण्यात अडथळे येतात. पावसामुळे शॅक उभारण्यासही उशीर होतो. यामुळे या व्‍यावसायिकांचे आर्थिक नुकसान होते, असे लोबो म्‍हणाले.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
