Goa Yachting: बेकायदा यॉटिंगवर होणार कारवाई, पंधरा दिवसांत नोंदणी करण्याचा पर्यटन खात्याचा आदेश

पणजी: गोवा सरकारच्या पर्यटन विभागाने सर्व यॉटिंग सेवा पुरवठादारांना गोवा पर्यटन व्यापार नोंदणी अधिनियम 1982 आणि नियमावली 1985 अंतर्गत आवश्यक परवानग्या घेण्याचे सक्त आदेश दिले आहेत.

पुढील 15 दिवसांत नोंदणी अनिवार्य

दरम्यान, पर्यटन विभागाच्या अधिकृत परिपत्रकानुसार यॉटिंग सेवा पुरवणाऱ्या सर्व व्यावसायिकांनी पुढील 15 दिवसांच्या आत आपली नोंदणी पूर्ण करणे बंधनकारक आहे. यामागचा उद्देश यॉटिंग सेवा नियंत्रित करणे, पर्यटकांच्या सुरक्षिततेला प्राधान्य देणे आणि कायदेशीर अटींचे पालन सुनिश्‍चित करणे हा आहे.

बेकायदेशीर सेवा पर्यटकांसाठी जीवघेणी ठरु शकते

पर्यटन संचालक केदार नाईक यांनी याबाबत प्रतिक्रिया देताना सांगितले की, राज्यातील जलक्रीडा सेवा अधिक पारदर्शक आणि उत्तरदायित्वपूर्ण करण्यासाठी आम्ही प्रयत्नशील आहोत. कोणतीही बेकायदेशीर सेवा ही पर्यटकांच्या (Tourists) सुरक्षिततेसाठी तसेच पर्यावरणासाठी धोकादायक ठरु शकते. त्यामुळे सर्व संबंधित व्यावसायिकांनी पुढे येऊन आवश्यक ती नोंदणी करुन आपली सेवा अधिकृत करावी, असे आवाहन करण्‍यात आले आहे.