Private Bus Accident: तेलंगणातील खासगी प्रवासी बस धारबांदोडा येथे पलटी; प्रवासी जखमी तर चालकाचा मृत्यू

Goa To Hyderabad Interstate Bus Overturns At Dharbandora: दुर्गीणी धारबांदोडा येथे एका खासगी प्रवासी बसचा अपघात झाला आहे. खासगी बस राष्ट्रीय महामार्गाच्या बाजूला कोसळली.

या अपघातात अनेक प्रवासी जखमी झाले आहेत. तर चालकाचा बसखाली चिरडून दुर्देवी मृत्यु झाला. घटनेची माहिती मिळताच पोलीस व अग्निशामक दलाचे जवान घटनास्थळी दाखल झाले.

याबाबत मिळालेल्या माहितीनुसार, सोमवारी संध्याकाळी गोव्याहून हैदराबादला जाणारी पर्यटक बस दुर्गीणी धारबांदोडा येथे आली असता बसचालकाचे नियंत्रण सुटल्याने राष्ट्रीय महामार्गाच्या बाजूला कोसळली.

या पर्यटक बसमध्ये 40 प्रवासी प्रवास करीत होते. अपघातात सुमारे 25 प्रवासी जखमी झाले असून, दोघे बसखाली चिरडल्याची शक्यता वर्तविण्यात येत असून बसखाली चिरडलेल्या महिलेला गंभीर अवस्थेत बाहेर काढण्यात आले.

तर चालकाचा बसखाली चिरडून दुर्देवी मृत्यू झाला. घटनास्थळी पोलिस, अग्निशामक दल, स्थानिकांमार्फत बचावकार्य सुरु आहे.