International Cruise Mormugao Port: राज्यात आलिशान क्रूझवरून पर्यटनासाठी गोव्यात येणाऱ्या प्रत्येक पर्यटकाचे भव्यदिव्य स्वागत मुरगाव बंदरात केले जाणार आहे. यासाठी प्रत्येक क्रूझ बोटीमागे 1 लाख ६५ हजार रुपये खर्च करण्याची तयारी सरकारने ठेवली असल्याची माहिती मिळाली आहे.
व्यावसायिक पद्धतीने हे स्वागत व्हावे यासाठी एखादी कंपनीच त्यासाठी नेमण्याचा विचार सुरू आहे. जलपर्यटनाच्या जागतिक नकाशावर गोव्याला पक्के स्थान मिळवून देण्यासाठी ही शक्कल लढवण्यात येणार आहे.
या पर्यटन हंगामातील पहिली क्रूझ बोट मुरगाव बंदरात येत्या ११ नोव्हेंबरला येणार आहे. त्या पर्यटकांचे अभूतपूर्व असे स्वागत करण्याची तयारी सध्या करण्यात येत आहे.
आंतरराष्ट्रीय पातळीवर पर्यटकांची ने-आण करणाऱ्या इंटरनॅशनल क्रूझ सेवा पुरवणाऱ्या कंपन्यांकडून गोव्याचा समावेश त्यांच्या पर्यटन मार्गावर करावा यासाठी विशेष प्रयत्न सध्या करण्यात येत आहेत.
वस्तू व सेवा कर परिषदेने आंतरराष्ट्रीय क्रूझ पर्यटनावरील पाच टक्के जीएसटी सहा महिन्यांसाठी माफ केला आहे. यामुळे या काळामध्ये क्रूझ पर्यटन वाढेल अशी अपेक्षा व्यक्त केली जात आहे.
यामुळेच यंदाच्या हंगामात ७२ क्रूझ बोटी मुरगाव बंदरात येतील असे मानले जात आहे. गेल्या महिन्यात २४ रोजी २१८ पर्यटकांसह एक देशी क्रूझ बोट मुरगाव बंदरात आली होती.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
