Goa TMC : राज्‍यातील ऊसउत्पादकांची लुबाडणूक; कंत्राटदारांची चौकशी करा

"राज्‍यातील ऊसउत्पादकांना प्रोत्साहन देण्यासाठी, त्यांच्या समस्या सोडविण्‍यासाठी ऊसउत्पादक सुविधा व सन्मान समिती स्थापन करण्यात आली व तिचे अध्यक्षपद नरेंद्र सावईकर यांच्‍याकडे देण्‍यात आले."

"परंतु ते ऊसउत्पादकांना न्याय देण्यास असमर्थ ठरले आहेत. त्यांच्या अध्यक्षतेखाली सभासदांपैकी फ्रान्‍सिस मास्कारेन्हस याने ऊसविक्रीचे कंत्राट घेऊन शेतकऱ्यांना कमी मोबदला दिला व स्‍वार्थ साधला," असा आरोप गोवा टीएमसी सरचिटणीस राखी प्रभुदेसाई नाईक यांनी केला. त्या पणजी येथे आयोजित पत्रकार परिषदेत बोलत होत्या.

यावेळी ऊसउत्पादक शेतकरी प्रशांत गावस देसाई, दयानंद फळदेसाई, बमो गावकर उपस्थित होते. जी व्यक्ती एखाद्या समितीवर असते, त्यालाच ऊसविक्रीचे कंत्राट कसे काय देण्यात आले? शेतकऱ्यांच्या हक्काचे पैसे त्यांनी खाल्ले. या प्रकरणाची चौकशी करण्याची मागणी करण्‍यात आली.