रिलेशनशीप, मोबाईलवरुन वर्गात अपमान केला, मानसिक धक्का बसलेल्या 17 वर्षीय मुलीने शाळाच सोडली; गोव्यात शिक्षकाविरोधात गुन्हा

कळंगुट: विद्यार्थीनिला मानसिक त्रास दिल्याप्रकरणी बार्देशमधील उच्च माध्यमिक शाळेच्या शिक्षकाविरोधात गुन्हा नोंद करण्यात आला आहे. वर्गातच खोटे आरोप करुन अपमान केल्यानंतर १७ वर्षीय विद्यार्थीनीला जबर मानसिक धक्का बसला आणि तिने शाळेत जायचं बंद केल्यानंतर हा प्रकार उघडकीस आला. साळगाव पोलिसांनी याप्रकरणी गुन्हा नोंद केलाय.

पोलिसांनी दिलेल्या माहितीनुसार, १७ वर्षीय पीडित विद्यार्थीनीच्या पालकांनी याप्रकरणी साळगाव पोलिसांत तक्रार दाखल केली आहे. शिक्षकाने विद्यार्थीनीला सर्व वर्गासमोर अपनास्पद वागणूक दिल्याचा आरोप पालकांनी केला आहे. २६ सप्टेंबर रोजी दुपारी दीड वाजता ही घटना घडली.

शिक्षकाने विद्यार्थीनीवर खोटे आरोप केले. यात तिच्या वैयक्तिक रिलेशनशीप आणि कॅम्पसमध्ये मोबाईल वापरण्यावरून अपमान केला.

यामुळे विद्यार्थीनीला जोरदार मानसिक धक्का बसला असून, भावनिक त्रास झाला. मानसिक धक्क्यामुळे विद्यार्थीनी सध्या मानसोपचार घेत असून, शिक्षण सोडल्याचे तक्रारीत नमूद करण्यात आले आहे.

पालकांनी दिलेल्या तक्रारीनंतर साळगाव पोलिसांनी याप्रकरणी गोवा बाल कायदा कलम ७ आणि बालन्याय (बाल सुरक्षा) कायदा कलम ७५ अंतर्गत गुन्हा नोंद केला आहे. पोलिस निरीक्षक मिलिंद भुईंबर यांच्या मार्गदर्शनाखाली पोलिस उपनिरीक्षक सर्वेश भंडारी या प्रकरणाचा तपास करत आहेत.