Goa Taxi App: 95% गोमंतकियांचे टॅक्सी ॲप धोरणाला समर्थन, टीटीएजीतर्फे गुप्त सर्वेक्षण, धोरण दूरदृष्टीचे असल्याचा दावा

पणजी: गोवा सरकारने राबवलेल्या टॅक्सी ॲप धोरणाला व्यापक जनसमर्थन मिळत असून, त्याबाबत टीटीएजीने (ट्रॅव्हल अँड टुरिझम असोसिएशन ऑफ गोवा) केलेल्या सर्वेक्षणात तब्बल ९५ टक्के लोकांनी या धोरणास पाठिंबा दर्शवला आहे. टीटीएजी अध्यक्ष जॅक सुखिजा यांनी ही माहिती देताना या धोरणाचे भविष्यकालीन फायदे अधोरेखित केले.

सुखिजा म्हणाले की, जेव्हा आम्ही सर्वेक्षण करण्याचा निर्णय घेतला तेव्हा ते गुप्ततेत पार पडले. कुठेही मोठा प्रचार केला नाही. पण अवघ्या दोन दिवसांत ४००० हून अधिक लोकांनी सरकारच्या टॅक्सी ॲप धोरणास समर्थन दिले. यावरूनच हे धोरण लोकांच्या मनात किती स्वीकारले गेले आहे, हे स्पष्ट होते.

टॅक्सी ॲप धोरण केवळ तांत्रिक नव्हे तर दूरदृष्टीचे असल्याचेही टीटीएजीने नमूद केले आहे. हे धोरण पर्यटक, स्थानिक नागरिक, टॅक्सी चालक सर्व घटकांसाठी फायदेशीर ठरणार आहे. पर्यटन क्षेत्रातील प्रमुख भागधारक संघटना म्हणून आम्ही या उपक्रमाला आमचा पूर्ण पाठिंबा देतो, असे सुखिजा यांनी स्पष्ट केले.

सरकारच्या टॅक्सी ॲप्समुळे टॅक्सी चालकांना भाड्याचे दर पारदर्शकपणे मिळतील, असेही टीटीएजीने सांगितले.

जे चांगले आहे, ते स्वीकारणे आवश्यक

जॅक सुखिजा यांनी सांगितले की, जे धोरण पर्यटकांसाठी योग्य आहे आणि पर्यटन व्यवसायाला चालना देणारे आहे, ते स्वीकारणे हीच वेळेची गरज आहे. आपल्याला यशस्वी पर्यटन उद्योग हवा असेल, तर अशी धोरणे मार्गी लावणे आवश्यक आहे.

सकारात्मक पाऊल

‘गोवा टॅक्सी ॲप’ आणि ‘गोवा माईल्स’मुळे टॅक्सी सेवा अधिक नियोजित, पारदर्शक आणि पर्यटक-मित्र बनवण्याचा उद्देश सरकारने ठेवला आहे.