WTT Star Contender Tournament: फ्रान्सचा फेलिक्स पुरुष एकेरीत विजेता

WTT Star Contender Tournament: फ्रान्सचा 17 वर्षीय जागतिक क्रमवारी आठव्या स्थानी असलेला फेलिक्स लेब्रून याने वर्ल्ड टेबल टेनिस (डब्ल्यूटीटी) स्टार कंटेंडर 2024 स्पर्धेत पुरुष एकेरीत विजेतेपद पटकावले.

महिला एकेरीत तैवानची चेंग आय-चिंग विजेती ठरली. स्पर्धेतील अंतिम लढती रविवारी पेडे-म्हापसा येथील क्रीडा संकुलात झाल्या.

फेलिक्स लेब्रून याने अंतिम लढतीत दोन गेम्स गमावल्यानंतर ब्राझीलियन ह्युगो काल्देरानो याच्याविरुद्ध विजयी मुसंडी मारली. फेलिक्सने जागतिक क्रमवारीत सातव्या स्थानी असलेल्या खेळाडूस ४-२ (९-११, ९-११, १३-११, ११-०, १५-१३, ११-७) असे हरविले.

गतवर्षी गोव्यात झालेल्या या स्पर्धेत चेंग आय-चिंग उपविजेती ठरली होती. यावेळेस तिने जर्मनीच्या निना मिट्टेल्हॅम हिला नमवून करंडक पटकावला. चेंग हिने सामना ४-० (११-८, ११-८, १७-१५, ११-६) असा सहजपणे जिंकला.

स्पर्धेच्या मिश्र दुहेरीत शिन युबिन व लिम जाँगहून जोडीने विजेतेपद प्राप्त केले. दक्षिण कोरियन जोडीने स्पेनच्या अल्व्हारो रॉबल्स व मारिया शियाओ जोडीस ३-० (११-२, १२-१०, १३-११) असे नमविले.

पुरुष दुहेरीत दक्षिण कोरियाच्या लिम जाँगहून व ॲन जेएह्यून जोडीने बाजी मारली. त्यांनी पॅट्रिक फ्रँझिस्का व डँग कियू जोडीला ३-० (११-९, ११-९, ११-७) असे नमविले.

महिला दुहेरीत दक्षिण कोरियाच्याच जेओन जिही व शिन युबिन जोडीची सरशी झाली. त्यांनी चोई ह्योजू व जू चेओनहुई जोडीवर ३-१ (११-४, ११-४, १५-१७, ११-६) अशी मात केली.