Star Contender Table Tennis: नित्या मणीची इंग्लंडच्या टिन-टिन हो वर मात; नित्या मुख्य फेरीसाठी पात्र

Star Contender Table Tennis: चुरशीच्या लढतीत इंग्लंडच्या टिन-टिन हो हिच्यावर मात करून चेन्नई येथील नित्या मणी हिने डब्ल्यूटीटी स्टार कंटेंडर २०२४ टेबल टेनिस स्पर्धेच्या मुख्य फेरीसाठी पात्रता मिळविली.

पेडे-म्हापसा येथील क्रीडा संकुलात सुरू असलेल्या या स्पर्धेच्या महिलांच्या पात्रता फेरीतील शेवटच्या लढतीत नित्या हिने इंग्लंडच्या खेळाडूला ३-२ (११-७, ६-११, ५-११, ११-९, ११-७) असे निसटते नमविले.

स्पर्धेच्या मुख्य फेरीला गुरुवारपासून सुरवात होत आहे. महिला पात्रता फेरीत भारताच्या अहयिका मुखर्जी, दिया चितळे, सुतिर्था मुखर्जी यांची वाटचाल खंडित झाली. अहयिका हिला तुर्किएच्या सिबेल अल्टिन्काया हिने १-३ (११-५, ९-११, ६-११, ६-११) हरविले.

स्पेनच्या सोफिया झँग हिने दिया हिच्यावर ३-१ (११-५, ६-११, १४-१२, ११-०) अशी मात केली, तर सुतिर्था हिला हान्ना रियू हिच्याकडून १-३ (८-११, ७-११, १२-१०, ४-११) असा पराभव पत्करावा लागला.

पुरुष एकेरीत फ्रान्सच्या व्हिन्सेंट पिकाँ याच्याकडून भारताच्या ज्ञानशेखरन साथियन याला १-३ (८-११, ७-११, १२-१०, ४-११) असा पराभव पत्करावा लागला. मानव ठक्करला सेनेगलच्या इब्राहिमा दियाव याने ३-० (१२-१०, ११-६, ११-७) असे नमविले.

पुरुष दुहेरीत जीत चंद्रा व पायस जैन यांनी, तर महिला दुहेरीत सायली वाणी व तनीषा कोटेचा यांनी मुख्य फेरी गाठली. मिश्र दुहेरीत मानुष शाह व दिया चितळे यांनी आगेकूच राखली.