Cyber Fraud: गोव्यात ज्येष्ठ नागरिकाला 2.83 लाखांचा गंडा; भीती दाखवून बँक खात्यातून रक्कम लंपास, सायबर क्राईम पोलिस ठाण्यात FIR दाखल

म्हापसा: भीती दाखवून आणि दिशाभूल करून बार्देश तालुक्यातील पर्रा येथील एका ज्येष्ठ नागरिकाच्या बँक खात्यातून २ लाख ८३ हजार ९५६ रुपये परस्पर काढून घेतल्याचा प्रकार समोर आला आहे. या प्रकरणी अज्ञात व्यक्तीविरुद्ध फसवणुकीचा गुन्हा नोंदवण्यात आला आहे.

पर्रा येथील रहिवासी जाओ फर्नांडिस (५९) यांनी दिलेल्या तक्रारीनुसार, ४ ऑक्टोबर २०२६ रोजी सकाळी सुमारे ७.२६ वाजता एका अज्ञात व्यक्तीने त्यांच्याशी संपर्क साधला. संबंधित व्यक्तीने भीती दाखवून तसेच खोटी माहिती देऊन त्यांचा विश्वास संपादन केला. त्यानंतर तक्रारदाराच्या बँक खात्यातून अनधिकृत व्यवहार करून एकूण २ लाख ८३ हजार ९५६ रुपये काढून घेतले.

तपास म्हापसा पोलिसांकडे वर्ग

या प्रकरणी सायबर क्राईम पोलीस ठाण्यात प्राथमिक प्रथम माहिती अहवाल (एफआयआर) दाखल करण्यात आला. त्यानंतर या प्रकरणाचा तपास म्हापसा पोलीस ठाण्याकडे वर्ग करण्यात आला. त्यानुसार, ८ ऑक्टोबर २०२६ रोजी म्हापसा पोलिसांनी भारतीय न्याय संहिता, २०२३ च्या कलम ३१८ अन्वये फसवणुकीचा गुन्हा नोंदवला आहे.