Mormugao Port Goa: मुरगाव बंदरात मच्छीमार बोटींना बार्जची धडक

Mormugao Port Goa: मुरगाव बंदरात माल भरण्यासाठी जाणाऱ्या बार्जच्या इंजिनमध्ये बिघाड झाल्याने खारीवाडा मच्छीमार जेटीवर समुद्रात नांगरून ठेवलेल्या मच्छीमार बोटींना बार्जची जोरदार धडक बसली. बार्जने धडक दिली, तेव्हा बोटींमध्ये कामगार होते. मात्र, सुदैवाने त्यांना दुखापत झाली नाही.

मिळालेल्या माहितीनुसार, बार्जच्या इंजिनमध्ये बिघाड झाल्याने समुद्रात नांगरून ठेवलेल्या मच्छीमार बोटींना बार्जचा जबरदस्त धक्का बसला.

यावेळी बोटींच्या समूहातील ‘ईगल’ बोटीचे मोठ्या प्रमाणात नुकसान झाले. बोटीला बार्जची धडक बसली, तेव्हा बोटीत कामगार उपस्थित होते. मात्र, संभाव्य दुर्घटना टळली.

यापूर्वीही अनेकदा मुरगाव बंदरात बार्ज वाहतुकीमुळे खारीवाडा किनाऱ्यावरील मच्छिमारी बोटींचे लाखो रुपयांचे नुकसान झाले आहे.

अखिल गोवा मच्छीमार बोटमालक संघटनेने वेळोवेळी सरकारी दरबारी तक्रारी केल्याची माहिती संघटनेचे अध्यक्ष तथा माजी महसूलमंत्री जुझे फिलीप डिसोझा यांनी दिली.