सांगोल्डा: गोव्यातील सांगोल्डा जंक्शन परिसरात आज पहाटेच्या सुमारास एक भीषण रस्ते अपघात झाला. वेगाने जाणाऱ्या एका स्पोर्ट्स बाईकचे नियंत्रण सुटल्याने झालेल्या या अपघातात महाराष्ट्रातील एका ४८ वर्षीय दुचाकीस्वाराला आपला जीव गमवावा लागला आहे.
मिळालेल्या माहितीनुसार, हा अपघात पहाटे ४:३० च्या सुमारास सांगोल्डा जंक्शन जवळ घडला. विकास सोलाथ (रा. बारामती, महाराष्ट्र) हे आपल्या महाराष्ट्र पासिंगच्या 'यामाहा R1' (Yamaha R1) या महागड्या स्पोर्ट्स बाईकने जात होते. एका तीव्र वळणावर (Sharp Turn) त्यांचा गाडीवरील ताबा सुटला आणि दुचाकी थेट रस्त्याच्या कडेला असलेल्या एका कंपाऊंड वॉलवर जाऊन आदळली.
हा अपघात इतका भीषण होता की, धडक लागताच विकास सोलाथ यांच्या डोक्याला गंभीर दुखापत झाली. डोक्याला झालेल्या भीषण मारामुळे त्यांचा मृत्यू झाल्याचे सांगण्यात येत आहे. अपघाताचा आवाज ऐकून स्थानिक नागरिक घटनास्थळी धावले, मात्र तोपर्यंत उशीर झाला होता. या अपघातात दुचाकीचेही मोठ्या प्रमाणावर नुकसान झाले आहे.
घटनेची माहिती मिळताच पोलिसांनी घटनास्थळी धाव घेऊन पंचनामा केला. विकास सोलाथ यांचा मृतदेह उत्तरीय तपासणीसाठी पाठवण्यात आला असून त्यांच्या कुटुंबीयांना या घटनेची माहिती देण्यात आली आहे. हा अपघात अतिवेगामुळे झाला की अन्य काही तांत्रिक कारणामुळे, याचा तपास सध्या पोलीस करत आहेत. गोव्यातील रस्ते आणि विशेषतः वळणांवर वाहन चालवताना खबरदारी घेण्याचे आवाहन प्रशासनाकडून करण्यात येत आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.