Goa : चांदेल येथील रस्‍ता पाण्‍याखाली, वाहतूक बंद

पेडणे : गेल्‍या बारा दिवसांपासून सुरू असलेल्‍या संततधार पावसामुळे (Heavy Rain) चांदेल येथे गुरुवारी सायं. ४.३० वा.च्‍या सुमारास रस्‍ता पाण्‍याखाली (Road under water) गेला आणि वाहतुकीसाठी बंद झाला. रस्त्याच्या दोन्ही बाजूने वाहने (Vehicals) अडकून पडली होती. हा रस्ता या पंधरवड्यात पाण्याखाली जाण्याची दुसरी घटना आहे. १४ रोजी सायं. ७.३० वा.च्‍या सुमारास हा रस्ता पाण्याखाली गेला होता, तर गेल्या दोन वर्षी पावसाळ्यात तिळारी धरणाचे (Tilari Dam) पाणी अचानक नदीत सोडल्याने नदी, नाल्‍यांना पूर आल्‍याने लोकांची तारांबळ उडाली होती.

लोकांच्या घरात पुराचे (flood) पाणी शिरल्‍याने नुकसान झाले. तसेच शेती, बागायतींची मोठ्या प्रमाणात नुकसानी झाली होती. आता पुन्‍हा पाण्याची पातळी वाढू लागल्‍याने पुराचे पाणी तिळारी धरणातून सोडले नाही ना? अशी भिती स्‍थानिकांकडून व्‍यक्‍त केली जात आहे. दरम्‍यान, तिळारी धरण सूत्रांशी संपर्क साधला असता धरणाचे पाणी अद्याप सोडण्यात आले नसल्याचे सांगितले. यापूर्वी तिळारीचे पाणी सोडल्याने पुराचा फटका बसलेल्या इब्रामपुर गावातील लोकांशी संपर्क साधला असता, त्यांनी नदीच्या पाण्याची पातळी वाढली नसल्याचे सांगितले.