Goa Ration: नागरी पुरवठा खात्याने घेतला सडक्या तांदळाचा धसका; मडगाव, दवर्लीतील छापे

Goa Ration गोव्‍यात पुन्‍हा एकदा स्वस्त धान्य दुकानांमधून देण्यात येत असलेल्या तांदळाच्या दर्जाबाबत संशय व्यक्त करण्यात येत आहे. त्याला अनुसरून नागरी पुरवठा खात्याच्या निरीक्षकांनी आज मडगाव, दवर्ली भागातील काही स्वस्त धान्य दुकानांमध्ये छापे टाकून तपासणी केली.

नागरी पुरवठा खात्याच्या एका निरीक्षकाने सांगितले, की नागरी पुरवठा खात्याने मे व जून महिन्यात ११३१ तांदळाची पोती बदलून दिलेली आहेत. आम्ही कोणत्याही स्वस्त धान्य दुकानदारावर दबाव टाकत नाही.

लोकांना चांगला तांदूळ मिळावा म्हणूनच आम्ही तपासणी करीत आहोत. आज केलेल्या तपासणीत कुठेही खराब तांदूळ सापडलेला नाही. जे लाभार्थी रेशन घेण्यासाठी आले, त्यांच्याकडेही चौकशी केली व त्यांनीही तक्रार केलेली नाही.

एका स्वस्त धान्य दुकानांमध्ये गेल्या महिन्यात पुरवठा केलेल्या तांदळाची अनेक पोती सापडली. महिला दुकानदाराने सांगितले की हा तांदूळ या महिन्यात लाभार्थ्यांना वितरित केला जाईल.

दुकानदारांच्या तक्रारींकडे दुर्लक्ष

काही दुकानदारांनी सांगितले, की गेल्या तीन महिन्यांपासून खराब तांदळाचा पुरवठा केला जात आहे. त्यामुळे हा तांदूळ लाभार्थी नेत नाहीत व आम्हाला नुकसान सोसावे लागते. दवर्लीतील एका दुकानदाराने सांगितले, की निरीक्षकांना समस्या सांगितली असली, तरी ते ती गांभीर्याने घेत नाहीत.