Goa Rajya Sabha Election 2023: राज्यसभेच्या गोव्यातील एकमेव जागेसाठी भाजप प्रदेशाध्यक्ष सदानंद शेट तानावडे यांचे नाव भाजप सुकाणू समितीने एकमुखाने गेल्या आठवड्यात निश्चित केले आहे. तानावडे यांच्या नावाची अधिकृत घोषणा करण्यात आली असून, तानावडे आज (मंगळवार, दि.11) त्यांचा उमेदवारी अर्ज दाखल करणार आहेत.
सदानंद शेट तानावडे आज दुपारी एक वाजता त्यांचा अर्ज दाखल करतील, अशी माहिती समोर आली आहे.
राज्यसभा खासदार विनय तेंडुलकर यांची राज्यसभेची मुदत 28 जुलै रोजी संपत असल्याने 24 जुलै रोजी मतदान होत असल्याची घोषणा निवडणूक आयोगाने केली आहे. दरम्यान, राज्यात भाजपची बहुमत असलेली एकहाती सत्ता असून भाजपला राज्यसभेची जागा जिंकणे सहज सोपे आहे.
भाजपकडून या जागेसाठी तानावडे यांचा एकमेव अर्ज सुकाणू समितीसमोर होता. त्याला केंद्रीय समितीची अनुमती मिळाली असून, तानावडे यांच्या नावाची अधिकृत घोषणा करण्यात आली आहे. तानावडे आज दुपारी एकच्या सुमारास राज्यसभेसाठी त्यांचा अर्ज दाखल करतील.
सध्या भाजपकडे स्वतःचे 28 आमदार असून, मगोपचे 2 आणि 3 अपक्ष मिळून 33 आमदार भाजपसोबत आहेत. विरोधकांकडे काँग्रेसचे 3, ‘आप’चे 2, तसेच गोवा फॉरवर्ड आणि आरजी यांचे प्रत्येकी 1 असे मिळून सात आमदार आहेत.
भाजपकडील संख्याबळ पाहता तानावडे बहुमताने निवडून येतील. जर विरोधकांनी आपला उमेदवार उभा केला नाही, तर तानावडे बिनविरोध निवडून येण्याचीही शक्यता आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
