Goa Unseasonal Rain: वादळी पावसाने गोव्याला झोडपले; वीजपुरवठा खंडित

Goa Unseasonal Rain

गोव्यात गुरुवारी (दि.23) संध्याकाळी सर्वत्र वादळी वाऱ्यांसह पावसाने जोरदार हजेरी लावली. विजांचा लखलखाट आणि ढगांच्या गडगटांसह मुसळधार पाऊस कोसळला. त्यामुळे हवेत गारवा निर्माण झाला.

अनेक ठिकाणी झाडे पडण्याच्या तसेच वीजखांब कोसळण्याच्या घटना घडल्या. त्यामुळे वीजपुरवठा खंडित होऊन अनेक ठिकाणी अंधार पसरला. जनजीवन विस्कळीत झाले. राजधानी पणजीसह, मडगाव, म्हापसा, डिचोली, सत्तरीत तर जोरदार पर्जन्‍यवृष्‍टी झाली.

‘रेमल’ चक्रीवादळाचा धोका

बंगालच्‍या उपसागरात कमी दाबाचा पट्टा निर्माण झाला आहे. त्‍यामुळे २५ मेपर्यंत त्याचे ‘रेमल’ चक्रीवादळात रूपांतर होऊन ते २६ मे रोजी सायंकाळी पश्‍चिम बंगाल आणि बांगलादेश किनारपट्टीवर पोहोचण्याची शक्यता आहे. या चक्रीवादळामुळे दक्षिण भारतातील केरळ, तामिळनाडू, आंध्रप्रदेश, त्रिपुरा, मिझोराममध्‍ये जोरदार पावसाची शक्यता आहे. तसेच गोव्यातही गडगडाटासह पर्जन्‍यवृष्‍टी होऊ शकते, अशी शक्यता हवामान खात्‍याने वर्तविली आहे.

कोठे काय घडले?

वेळूस वीज उपकेंद्रावर वीज पडून इन्सुलेटरचा स्फोट.

नाणूस गोसंवर्धन केंद्राजवळ कोसळला वीजखांब.

शिगाव-कुळेत झाडांसह, वीजखांब पडले उन्‍मळून.

पिळगाव, डिचोलीतही झाडांची पडझड.

फोंड्यात कारवर माड कोसळून हानी, अनर्थ टळला.

नार्वेत वीजदुरुस्‍ती करताना शॉक लागून लाईनमन जखमी.