Goa Rain: 'गोंयची दिवाळी, पावसांन व्हावली', हवामान खात्याकडून Yellow Alert; नागरिक आणि पर्यटकांना सतर्क राहण्याचे आवाहन

Goa Diwali Weather: गोव्यात दिवाळीचा उत्साह शिगेला पोहोचलेला असतानाच, परतीच्या पावसाचा जोर आणि काही ठिकाणी चक्रीवादळाचा तडाखा बसल्याने नागरिकांच्या आनंदावर विरजण पडले आहे. राज्य हवामान विभागाने पुढील चार दिवसांसाठी 'यलो अलर्ट' कायम ठेवला असून, येत्या २५ ऑक्टोबरपर्यंत राज्यात पाऊस राहण्याची शक्यता वर्तवली आहे. दिवाळीचा मुख्य दिवस उत्साहात पार पडला असला तरी पाडवा आणि भाऊबीज या सणांच्या मुहूर्तावर नागरिकांना सतर्क राहण्याचे आवाहन करण्यात आले आहे.

मंगळवारी (दि. २१) सायंकाळी लक्ष्मीपूजनाच्या लगबगीदरम्यान हा नैसर्गिक प्रकोप अनुभवण्यास मिळाला. विजांचा कडकडाट आणि ढगांच्या गडगडाटासह पडलेल्या जोरदार पावसाने मये आणि डिचोलीच्या काही भागांना चक्रीवादळाचा मोठा तडाखा बसला.

या वादळामुळे परिसरात मोठ्या प्रमाणात झाडांची पडझड झाली. या पडझडीची झळ केवळ रस्त्यांपुरती मर्यादित न राहता, चार घरांना आणि एका गोठ्यालाही बसली. यामुळे या कुटुंबांचे मोठे नुकसान झाले आहे.

या चक्रीवादळामुळे मयेसह डिचोली भागात मोठी हानी झाली आहे. वीजवाहिन्या तुटून वीज खांबांचीही मोडतोड झाली. परिणामी, परिसरातील वीजपुरवठा खंडित झाला आहे. त्याचबरोबर, मये भागातील बागायतींमध्येही मोठ्या प्रमाणात झाडे उन्मळून पडल्याने शेतकऱ्यांचे मोठे नुकसान झाले आहे.

मॉन्सूनने माघार घेऊनही गोव्यात पावसाचा जोर वाढल्यामुळे आता पुढील सणांवर (पाडवा, भाऊबीज) याचे सावट आले आहे. नागरिकांनी हवामान खात्याच्या सूचनांचे पालन करावे आणि आवश्यक ती खबरदारी घ्यावी.